കടുവ തീര്‍ക്കുവാണേല്‍ ഇത്ര സങ്കടമുണ്ടാകില്ലായിരുന്നു ;രക്ഷപ്പെടുത്താമായിരുന്നിട്ടും കൊന്നുകളഞ്ഞു,മന്ത്രിക്ക് മുന്നിൽ പൊട്ടിക്കരഞ്ഞ് തോമസിന്‍റെ ഭാര്യയും മക്കളും

മാനന്തവാടി : കടുവ ആക്രമണത്തിൽ പരിക്കേറ്റ് മരിച്ച കർഷകൻ തോമസിന്റെ മരണത്തിൽ വികാരഭരിതയായിമന്ത്രിക്ക് മുന്നിൽ പൊട്ടിക്കരഞ്ഞ് തോമസിന്റെ ഭാര്യയും മക്കളും. തോമസിന്റെ വീട്ടില്‍ വനം മന്ത്രി എ.കെ. ശശീന്ദ്രന്‍ എത്തിയപ്പോഴായിരുന്നു ഭാര്യയടക്കമുള്ള ബന്ധുക്കള്‍ അദ്ദേഹത്തിന് മുന്നില്‍ പൊട്ടിക്കരഞ്ഞ് പ്രതികരിച്ചത്. ഏറെ നേരം രക്തം വാര്‍ന്ന് കിടന്നത് കൊണ്ട് മാത്രമാണ് തോമസിന് ജീവന്‍ നഷ്ടമായതെന്ന് ബന്ധുക്കള്‍ മന്ത്രിയോട് പറഞ്ഞു. ഇത്തരം സന്ദര്‍ഭങ്ങളില്‍ അടിയന്തിര ശസ്ത്രക്രിയ നടത്താനുള്ള സംവിധാനങ്ങള്‍ വയനാട്ടില്‍ ഒരു ആശുപത്രിയില്‍ പോലും ഇല്ല. മതിയായ ആംബുലന്‍സ് സംവിധാനങ്ങളില്ലാത്തതും തോമസിന്റെ ജീവന്‍ നഷ്ടപ്പെടാന്‍ ഇടയാക്കിയതായി ബന്ധുക്കള്‍ പരാതിപ്പെട്ടു.

വൈകുന്നേരം അഞ്ച് മണിയോടെയാണ് മന്ത്രി വീട്ടിലെത്തിയത്. തോമസിന്റെ ഭാര്യ സിനി. മക്കളായ സോജന്‍, സോന എന്നിവരെയും കുടുംബാംഗങ്ങളെയും അദ്ദേഹം ആശ്വസിപ്പിച്ചു. പുതുശ്ശേരിയിലും വെള്ളാരംകുന്നിലും രാത്രികാല പട്രോളിംഗ് ഊര്‍ജിതമാക്കുമെന്നും കുടുംബത്തിന് ആവശ്യമായ കൗണ്‍സലിംഗ് ലഭ്യമാക്കുമെന്നും മന്ത്രി പറഞ്ഞു. തോമസിന്റെ ഭാര്യ സിനി വിവിധ ആവശ്യങ്ങള്‍ അടങ്ങിയ നിവേദനം മന്ത്രിക്ക് സമര്‍പ്പിച്ചിട്ടുണ്ട്.