മോർഫ് ചെയ്ത ചിത്രം അയച്ച് ഓൺലൈൻ വായ്‌പ്പാ ആപ്പുകാരുടെ ഭീഷണി; സീരിയൽ നടിയും കെണിയിൽ; പണവും മാനവും പോയി; സമൂഹ്യമാധ്യമങ്ങളിൽ പൊട്ടിക്കരഞ്ഞ് നടി

ചെന്നൈ: ഓൺലൈൻ വായ്പ്പകളുടെ കെണിയിൽ പെട്ട് പണം നഷ്ടമായെന്ന പരാതിയുമായി പ്രശസ്ത തമിഴ്-തെലുങ്ക് നടി ലക്ഷ്മി വാസുദേവൻ. തന്റെ പണവും മാനവും നഷ്ടമായെന്ന് തുറന്നു പറയുന്ന വീഡിയോ ഇവർ തന്നെ സമൂഹമാദ്ധ്യമത്തിൽ പങ്കു വയ്‌ച്ചു. ഫിഷിങ് മെസേജിലെ ലിങ്കിൽ ക്ലിക്ക് ചെയ്തതോടെ ഫോൺ ഹാക്കായെന്നും പണം ആവശ്യപ്പെട്ട് ഭീഷണിപ്പെടുത്തി മോർഫ് ചെയ്ത ഫോട്ടോകളും വീഡിയോകളും മാതാപിതാക്കൾ അടക്കമുള്ളവർക്ക് അയച്ചുവെന്നും ഇവർ പറയുന്നു.

‘’അഞ്ച് ലക്ഷം രൂപ സമ്മാനം കിട്ടിയെന്ന് കാണിച്ച് ഈ മാസം 11നാണ് ഫോണിലേക്ക് സന്ദേശം വന്നത്. ഇതായിരുന്നു തട്ടിപ്പിന്റെ തുടക്കം. ഇതിലെ ലിങ്കിൽ ക്ലിക്ക് ചെയ്തതോടെ ഓൺലൈൻ വായ്പ ആപ്പ് ഡൗൺലോഡ് ആയി. പിന്നാലെ ഫോൺ ഹാങ് ആവുകയും ചെയ്തു. നാല് ദിവസത്തിന് ശേഷം വായ്പ തിരിച്ചടക്കണം എന്നാവശ്യപ്പെട്ട് സന്ദേശങ്ങൾ വന്നതോടെയാണ് തട്ടിപ്പിനിരയായെന്ന് മനസിലായത്. പണം കിട്ടില്ലെന്ന് അറിഞ്ഞതോടെ ഭീഷണിയായി. മോർഫ് ചെയ്ത ചിത്രങ്ങൾ മാതാപിതാക്കൾക്ക് അയച്ചു കൊടുക്കുമെന്നായിരുന്നു ഭീഷണി. വൈകാതെ തന്നെ അവർ മാതാപിതാക്കൾ ഉൾപ്പെടെ കോണ്ടാക്ടിലുള്ള മുഴുവൻ പേർക്കും മോർഫ് ചെയ്ത ചിത്രങ്ങൾ അയച്ചു കൊടുത്തുവെന്നും’’ ലക്ഷ്മി പറയുന്നു.

സെക്കന്തരാബാദ് സൈബർ പോലീസിൽ ഇതു സംബന്ധിച്ചുള്ള പരാതി നൽകിയിട്ടുണ്ടെന്നും, അന്വേഷണം പുരോഗമിക്കുകയാണെന്നും ഇവർ വ്യക്തമാക്കി. ആരും ഇത്തരമൊരു കെണിയിൽ കുടുങ്ങരുതെന്ന് പറഞ്ഞാണ് സന്ദേശം അവസാനിക്കുന്നത്.