ട്രെയിൻ ഗതാഗതം പുനരാരംഭിച്ചു; ഉച്ചയ്ക്കു ശേഷം പൂർവസ്ഥിതിയിലാകും; സമയങ്ങളിൽ മാറ്റം

തൃശൂർ: തൃശൂർ-പുതുക്കാട്ടിൽ പാളം തെറ്റിയ ഗുഡ്സ് ട്രെയിനിന്റെ (Train) എന്‍ജിനും അഞ്ചു കോച്ചുകളും പാളത്തില്‍ കയറ്റി. തിരുവനന്തപുരത്തേക്കുള്ള മലബാര്‍ എക്സ്പ്രസ് പാളത്തിലൂടെ കടത്തിവിട്ടു. ഇന്നലെ വൈകീട്ടാണ് തൃശൂര്‍ പുതുക്കാട് ചരക്ക് ട്രെയിന്‍ പാളം തെറ്റിയത്. ആദ്യത്തെ കുറച്ചു ട്രയിനുകൾക്കും വേഗ നിയന്ത്രണമുണ്ടാകുമെന്നാണ് റെയിൽവേ ഉദ്യോഗസ്ഥർ അറിയിച്ചത്. പുതിയ പാളത്തിന്റെ ബല പരിശോധന പൂർത്തിയാക്കിയ ശേഷമാണ് ട്രെയിൻ കടത്തിവിട്ടത്.

അതേസമയം ഗുഡ്സ് ട്രെയിന്‍ പാളം തെറ്റിയതിനെ തുടര്‍ന്ന ഒന്‍പത് ട്രെയിനുകള്‍ റദ്ദാക്കുകയും നിരവധി ട്രെയിനുകള്‍ വൈകിയോടുകയും ചെയ്യുന്നു. അപകടത്തെ തുടർന്ന് ഇന്നത്തെ പാലക്കാട്– എറണാകുളം മെമു, എറണാകുളം–കണ്ണൂർ ഇന്റർസിറ്റി, തിരുവനന്തപുരം–ഷൊർണൂർ വേണാട് എക്സ്പ്രസ്, ഷൊർണൂർ–എറണാകുളം മെമു, കോട്ടയം–നിലമ്പൂർ എക്സ്പ്രസ്, എറണാകുളം–തിരുവനന്തപുരം വഞ്ചിനാട് എക്സ്പ്രസ്, ഗുരുവായൂർ– എറണാകുളം എക്സ്പ്രസ് എന്നിവ പൂർണമായും റദ്ദാക്കി.

ഇരുമ്പനം ബിപിസിഎല്ലില്‍ ഇന്ധനം നിറക്കാന്‍ പോയ ട്രെയിന്‍ ഇന്നലെ ഉച്ചയ്ക്ക് 2.15 ഓടെയാണു പാളം തെറ്റിയത്. ട്രെയിനിൽ ചരക്ക് ഇല്ലാതിരുന്നതും പാളത്തിൽ അറ്റകുറ്റപ്പണി നടക്കുന്നതിനാൽ വേഗത കുറവായിരുന്നതും അപകടത്തിന്റെ വ്യാപ്‌തി കുറച്ചു.