സാൻവിച്ചിൽ ചിക്കൻ കുറവാണെന്ന് പരാതിപ്പെട്ട വിദ്യാർത്ഥികൾക്ക് നേരെ കത്തി വീശിയുള്ള പരാക്രമം !മാനേജരെ ജോലിയിൽ നിന്ന് പിരിച്ചു വിട്ട് ചിക്കിങ്

കൊച്ചി : ചിക്കിങ് ഔട്ട്ലെറ്റിൽ നിന്ന് വാങ്ങിയ സാൻവിച്ചിൽ ചിക്കൻ കുറവാണെന്ന് പരാതിപ്പെട്ട വിദ്യാർത്ഥികൾക്ക് നേരെ കത്തി വീശിയ മാനേജരെ ജോലിയിൽ നിന്ന് പിരിച്ചുവിട്ടു. മാനേജരുടെ പരാക്രമത്തിന്റെ വീഡിയോ ദൃശ്യങ്ങൾ സമൂഹ മാദ്ധ്യമങ്ങളിൽ പ്രചരിക്കുകയും ചിക്കിങ്ങിനെതിരേ വ്യാപക പ്രതിഷേധം ഉയരുകയും ചെയ്തിരുന്നു. പിന്നാലെയാണ് മാനേജരായ മുണ്ടംവേലി രാമേശ്വരം സ്വദേശി ജോഷ്വായ്‌ക്കെതിരെ കമ്പനി നടപടിയെടുത്തത്. സംഭവത്തിൽ മാനേജർക്കെതിരേയും മാനേജരെ മർദിച്ചവർക്കെതിരേയും എറണാകുളം സെൻട്രൽ പോലീസ് കേസെടുത്തിരുന്നു.

പ്ലസ് വൺ വിദ്യാർത്ഥികളാണ് സാൻവിച്ചിൽ ചിക്കൻ കുറവാണെന്ന് മാനേജരോട് പരാതിപ്പെട്ടത്. എന്നാൽ, മാനേജർ ഈ സമയം കുട്ടികളോട് തർക്കിച്ചു. ഇത് വിദ്യാർത്ഥികൾ മൊബൈലിൽ ചിത്രീകരിച്ചതോടെ തർക്കം രൂക്ഷമായി. ശേഷം വിദ്യാർത്ഥികൾ സഹോദരങ്ങളെ വിളിച്ചു വരുത്തി. തർക്കം കൂടുതൽ രൂക്ഷമാക്കി. തുടർന്ന് മാനേജർ അടുക്കളയിൽ ചെന്ന് കത്തിയുമായി പുറത്തേക്ക് വരികയായിരുന്നു. എല്ലാവരും ചേർന്ന് മാനേജരുടെ കൈയിൽ നിന്ന് കത്തി പിടിച്ചു വാങ്ങി മർദിച്ചു. ഇതിന്റെ ദൃശ്യങ്ങൾ കഴിഞ്ഞ ദിവസം പുറത്തുവന്നിരുന്നു.