പ്ലസ് ടു വിദ്യാർത്ഥിനിയെ വീട്ടിൽ കയറി പീഡിപ്പിക്കാന്‍ ശ്രമം ! സിപിഐ ലോക്കല്‍ കമ്മിറ്റി സെക്രട്ടറിക്കെതിരെ പോക്സോ കേസ് !!! പാർട്ടിയിൽ നിന്ന് പുറത്താക്കിയതായി നേതൃത്വം

തിരുവനന്തപുരം : പ്ലസ് ടു വിദ്യാർത്ഥിനിയെ വീട്ടിൽ കയറി പീഡിപ്പിക്കാന്‍ ശ്രമിച്ചെന്ന പരാതിയില്‍ സിപിഐ നേതാവിനെതിരെ പോക്സോ കേസെടുത്ത് പോലീസ്. അമ്പലത്തറ ലോക്കല്‍ കമ്മിറ്റി സെക്രട്ടറി വിഷ്ണു ബാബുവിനെതിരെയാണ് വിഴിഞ്ഞം പോലീസ് കേസ് രജിസ്റ്റര്‍ ചെയ്തത്. വിഴിഞ്ഞം മുല്ലൂരിലെ വീട്ടില്‍വച്ച് കഴിഞ്ഞ സെപ്റ്റംബറില്‍ വിഷ്ണു ലൈംഗികാതിക്രമത്തിനു ശ്രമിച്ചുവെന്നാണ് സ്വകാര്യ സ്‌കൂളില്‍ പഠിക്കുന്ന പ്ലസ് ടു വിദ്യാർത്ഥിനിയുടെ പരാതി. അതേസമയം വിഷ്ണുവിനെ സിപിഐ പാര്‍ട്ടിയില്‍ നിന്ന് പുറത്താക്കി.

പെണ്‍കുട്ടിയുടെ സഹോദരനെതിരെ സ്‌കൂള്‍ അധികൃതര്‍ സ്വീകരിച്ച അച്ചടക്ക നടപടി പിന്‍വലിക്കാന്‍ ഇടപെടണം എന്ന് ആവശ്യപ്പെട്ട് വിഷ്ണുവിനെ പെണ്‍കുട്ടിയും മാതാവും സമീപിച്ചിരുന്നു. പിന്നീട് പെണ്‍കുട്ടിയുടെ മാതാവുമായി വിഷ്ണു അടുപ്പത്തിലായി. വിവാഹിതനായ വിഷ്ണു കുടുംബസമേതം മുല്ലൂരിലുള്ള യുവതിയുടെ വീട്ടില്‍ പതിവായി സന്ദര്‍ശനം നടത്തിയിരുന്നു. കുടുംബാംഗത്തെ പോലെയായിരുന്നു വിഷ്ണു പെരുമാറിയിരുന്നത്. അതിനിടെ കഴിഞ്ഞ തിരുവോണ ദിനത്തില്‍ പെണ്‍കുട്ടിയും സഹോദരനും അമ്മയുമൊത്ത് വിഷ്ണുവിന്റെ വീട്ടിലെത്തിയാണ് സദ്യ കഴിച്ചത്.

ഇതിനു പിന്നാലെ സെപ്റ്റംബര്‍ 18ന് വിഷ്ണു ബാബു മുല്ലൂരിലുള്ള വിദ്യാര്‍ത്ഥിനിയുടെ വീട്ടിലെത്തി. കുടുംബാംഗങ്ങളുമൊത്ത് മദ്യപിച്ചു. തുടര്‍ന്ന് ഒന്നാം നിലയില്‍ കിടന്നുറങ്ങുകയായിരുന്ന പെണ്‍കുട്ടിയുടെ ശരീരത്തില്‍ ലൈംഗികോദ്ദേശത്തോടെ സ്പര്‍ശിച്ചതായാണ് പരാതി. വിഴിഞ്ഞം പൊലീസിന് യുവതി നല്‍കിയ പരാതിയുടെ അടിസ്ഥാനത്തിലാണ് പോക്സോ കേസ് രജിസ്റ്റര്‍ ചെയ്തു അന്വേഷണം തുടങ്ങിയത്. വിഷ്ണുവിനെതിരെ പാര്‍ട്ടിയും നടപടി എടുക്കും.