അണ്ടർ 23 വനിതാ ഏകദിനം: ഒഡീഷയെ തകർത്ത് കേരളത്തിന് ആവേശജയം; നിത്യ ലൂർദ്ദിന് അർദ്ധ സെഞ്ച്വറി

​പൂനെ: അണ്ടർ 23 വനിതാ ഏകദിന ടൂർണമെന്റിൽ ഒഡീഷയ്ക്കെതിരെ കേരളത്തിന് ഉജ്ജ്വല വിജയം. ഒരു ഘട്ടത്തിൽ പരാജയഭീതിയിലായിരുന്ന കേരളം, തകർച്ചയിൽ നിന്ന് പൊരുതിക്കയറി രണ്ട് വിക്കറ്റിന്റെ ആവേശകരമായ ജയമാണ് സ്വന്തമാക്കിയത്. ഒഡീഷ ഉയർത്തിയ 257 റൺസ് വിജയലക്ഷ്യം അഞ്ച് പന്തുകൾ ബാക്കിനിൽക്കെ എട്ട് വിക്കറ്റ് നഷ്ടത്തിൽ കേരളം മറികടന്നു.

​ടോസ് നേടി ആദ്യം ബാറ്റിങ്ങിനിറങ്ങിയ ഒഡീഷയ്ക്ക് ഓപ്പണർ തൻവി രഞ്ജനയുടെ തകർപ്പൻ സെഞ്ച്വറിയാണ് മികച്ച സ്കോർ സമ്മാനിച്ചത്. 118 പന്തുകളിൽ നിന്ന് 101 റൺസെടുത്ത തൻവി ഒരു വശത്ത് വിക്കറ്റുകൾ വീഴുമ്പോഴും ഉറച്ചുനിന്നു. അഞ്ചാം വിക്കറ്റിൽ സുചിസ്മിത പാണ്ഡെയുമായി (32) ചേർന്ന് തൻവി പടുത്തുയർത്തിയ 99 റൺസിന്റെ കൂട്ടുകെട്ടാണ് ഒഡീഷയെ 256-ൽ എത്തിച്ചത്. അവസാന ഓവറുകളിൽ അളകനന്ദ (32), ജ്യോതി പ്രസാദ് (26) എന്നിവരും ബാറ്റിങ്ങിൽ തിളങ്ങി. കേരളത്തിന് വേണ്ടി സൂര്യ സുകുമാർ, നിയ നസ്നീൻ എന്നിവർ രണ്ട് വിക്കറ്റ് വീതം വീഴ്ത്തി.

​മറുപടി ബാറ്റിങ്ങിൽ കേരളത്തിന് ഓപ്പണർമാരായ ദിയ ഗിരീഷും നജ്ല സി.എം.സിയും ചേർന്ന് 60 റൺസിന്റെ ഭേദപ്പെട്ട തുടക്കം നൽകി. വൈഷ്ണ എം.പി (30) കൂടി തിളങ്ങിയതോടെ കേരളം സുരക്ഷിതമെന്ന് തോന്നിച്ചെങ്കിലും മധ്യനിരയിൽ പെട്ടെന്നുണ്ടായ വിക്കറ്റ് വീഴ്ച ടീമിനെ സമ്മർദ്ദത്തിലാക്കി.
​എന്നാൽ ഏഴാമതായി ക്രീസിലെത്തിയ നിത്യ ലൂർദ്ദ് മത്സരത്തിന്റെ ഗതി മാറ്റിമറിച്ചു. മനസ്വിയുമായി (35) ചേർന്ന് ആറാം വിക്കറ്റിൽ 66 റൺസ് കൂട്ടിച്ചേർത്ത നിത്യ ടീമിനെ വിജയത്തിനടുത്തെത്തിച്ചു. മനസ്വി പുറത്തായ ശേഷം പത്താമതായി എത്തിയ നിയ നസ്നീനെ (23) കൂട്ടുപിടിച്ച് നിത്യ കേരളത്തെ വിജയതീരമണയിച്ചു. 73 റൺസുമായി പുറത്താകാതെ നിന്ന നിത്യ ലൂർദ്ദാണ് കേരളത്തിന്റെ വിജയശില്പി. ഒഡീഷയ്ക്ക് വേണ്ടി അനന്യ മിശ്ര രണ്ട് വിക്കറ്റ് നേടി.
​