പോലീസ് പെരുമഴയത്തിറക്കി വിട്ട ആശമാർക്ക് കുടകളും റെയിന്‍ കോട്ടുകളും വാങ്ങി നല്‍കി കേന്ദ്രമന്ത്രി സുരേഷ് ഗോപി ! വിഷയം പ്രധാനമന്ത്രിയുടെ ശ്രദ്ധയിൽപ്പെടുത്തുമെന്ന് ഉറപ്പ് നൽകി

സെക്രട്ടറിയേറ്റ് പടിക്കൽ സമരം ചെയ്യുന്ന ആശാവര്‍ക്കര്‍മാര്‍ക്ക് പിന്തുണയുമായി കേന്ദ്രമന്ത്രി സുരേഷ് ഗോപി. തിരുവനന്തപുരത്ത് കനത്തമഴ തുടരുന്നതിനിടെ ആശാവർക്കർമാർക്ക് കുടയും കോട്ടും അദ്ദേഹം വാങ്ങി നൽകി.

ആശാവർക്കർമാർക്ക് നേരെ ഗൂഢശ്രമങ്ങളൊന്നുമുണ്ടാകാതെ കരുതല്‍ കണ്ണുകള്‍ വെയ്ക്കണമെന്ന് സുരേഷ് ഗോപി മാദ്ധ്യമപ്രവര്‍ത്തകരോട് പറഞ്ഞു. ദില്ലിയിൽ വിഷയം ഉന്നയിക്കുമെന്നും കേന്ദ്ര ആരോഗ്യമന്ത്രി ജെപി നദ്ദയുമായി ചര്‍ച്ച ചെയ്യുമെന്നും ആവശ്യമെങ്കില്‍ പ്രധാനമന്ത്രിയെ കാണുമെന്നും അദ്ദേഹം പറഞ്ഞു

ഇന്നലെ പുലർച്ചെ ആശ വര്‍ക്കേഴ്‌സ് മഴ നനയാതിരിക്കാന്‍ കെട്ടിയ ടാര്‍പ്പാളില്‍ പോലീസ് അഴിച്ചുമാറ്റിയിരുന്നു.കോടതി ഉത്തരവാണ് നടപ്പാക്കുന്നത് എന്നായിരുന്നു പോലീസിന്റെ വാദം. നഗരത്തില്‍ പെയ്ത മഴയില്‍ നിന്ന് രക്ഷനേടാനാണ് ആശാവര്‍ക്കേഴ്‌സ് ടാര്‍പ്പാളിന്‍ കെട്ടിയത്.
സെക്രട്ടറിയേറ്റിന് മുന്‍പിലെ തെരുവ് വിളക്കുകൾ പോലീസ് ദിവസങ്ങള്‍ക്കു മുന്‍പ് അണച്ചിരുന്നു. പിന്നാലെയാണ് സമരക്കാര്‍ക്ക് നേരെയുള്ള അടുത്ത പ്രതികാര നടപടി. ഇതോടെ ഭയന്ന് പിന്മാറില്ലെന്ന് സമരക്കാര്‍ വ്യക്തമാക്കി.