ഝാൻസി ആശുപത്രി തീപിടിത്തം അന്വേഷിക്കാൻ നാലംഗ സംഘത്തെ രൂപീകരിച്ച് യു പി സർക്കാർ; ഏഴ് ദിവസത്തിനകം റിപ്പോർട്ട് സമർപ്പിക്കാൻ നിർദ്ദേശം

ലക്‌നൗ: ഉത്തർപ്രദേശിലെ ‌ ഝാൻസി ജില്ലയിലെ മഹാറാണി ലക്ഷ്മി ബായി മെഡിക്കൽ കോളേജിലെ കുട്ടികളുടെ വാർഡിലുണ്ടായ വൻ തീപിടിത്തത്തെക്കുറിച്ച് അന്വേഷിക്കാൻ സംസ്ഥാന ആരോഗ്യ വകുപ്പിൻ്റെ നാലംഗ അന്വേഷണ സമിതിക്ക് രൂപം നൽകി ഉത്തർപ്രദേശ് സർക്കാർ. ഡിജി മെഡിക്കൽ എജ്യുക്കേഷൻ്റെ അധ്യക്ഷതയിലാണ് നാലംഗ സമിതി രൂപീകരിച്ചത്. കേസിൻ്റെ വിശദമായ അന്വേഷണ റിപ്പോർട്ട് അടുത്ത ഏഴ് ദിവസത്തിനകം സമർപ്പിക്കണമെന്നും ഉത്തർപ്രദേശ് സർക്കാർ പ്രസ്താവനയിൽ പറഞ്ഞു. അതേസമയം, ഫയർ എക്‌സ്‌റ്റിംഗ്യൂഷറുകൾ കാലഹരണപ്പെട്ടതാണെന്ന റിപ്പോർട്ടുകളും സർക്കാർ തള്ളിക്കളഞ്ഞു.

ഈ കഴിഞ്ഞ വെള്ളിയാഴ്ച രാത്രി പത്തേമുക്കാലോടെ നവജാത ശിശുക്കളുടെ തീവ്രപരിചരണ വിഭാഗത്തിലാണ് തീപിടിത്തമുണ്ടായത്. 10 നവജാത ശിശുക്കളാണ് തീപിടിത്തത്തിൽ വെന്തുമരിച്ചത് . ഷോർട്ട് സർക്യൂട്ടാണ് അപകട കാരണമെന്നാണ് പ്രാഥമിക നിഗമനം. സംഭവം അത്യധികം ദുഃഖകരവും ഹൃദയഭേദകവുമാണെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് എക്സിൽ കുറിച്ചിരുന്നു.