ഇന്ത്യയ്‌ക്കെതിരായ താരിഫ് കുറയ്ക്കാൻ അമേരിക്ക!!സൂചന നൽകി യുഎസ് ട്രഷറി സെക്രട്ടറി

വാഷിംഗ്ടൺ: ഇന്ത്യയിൽ നിന്നുള്ള ഇറക്കുമതി ഉൽപ്പന്നങ്ങൾക്ക് ഏർപ്പെടുത്തിയിരിക്കുന്ന ഉയർന്ന നികുതി പകുതിയായി കുറയ്ക്കാൻ ഡൊണാൾഡ് ട്രമ്പ് ഭരണകൂടം ആലോചിക്കുന്നതായി റിപ്പോർട്ട്. ഇന്ത്യയും റഷ്യയും തമ്മിലുള്ള ഊർജ്ജ ഇടപാടുകളെച്ചൊല്ലിയുള്ള തർക്കത്തെത്തുടർന്ന് കഴിഞ്ഞ ഓഗസ്റ്റിലാണ് അമേരിക്ക ഇന്ത്യൻ ഉൽപ്പന്നങ്ങളുടെ ഇറക്കുമതി തീരുവ 50 ശതമാനമായി വർദ്ധിപ്പിച്ചത്. എന്നാൽ, നിലവിൽ ഇന്ത്യൻ റിഫൈനറികൾ റഷ്യൻ എണ്ണ വാങ്ങുന്നത് ഗണ്യമായി കുറച്ചതായും ഇത് വലിയ വിജയമാണെന്നും അമേരിക്കൻ ട്രഷറി സെക്രട്ടറി സ്കോട്ട് ബെസെന്റ് വ്യക്തമാക്കി. ഒരു പ്രമുഖ അന്താരാഷ്ട്ര മാധ്യമത്തിന് നൽകിയ അഭിമുഖത്തിലാണ് അദ്ദേഹം ഇക്കാര്യം സൂചിപ്പിച്ചത്.

റഷ്യൻ എണ്ണ വാങ്ങുന്നത് തുടരുന്ന പശ്ചാത്തലത്തിലാണ് ഇന്ത്യക്ക് മേൽ 25 ശതമാനം അധിക താരിഫ് ചുമത്തിയതെന്നും, ഇപ്പോൾ ആ സാഹചര്യം മാറിയതിനാൽ നികുതികൾ ഒഴിവാക്കുന്നതിനുള്ള നടപടികൾ ആലോചനയിലുണ്ടെന്നും ബെസെന്റ് പറഞ്ഞു. ഇന്ത്യയും അമേരിക്കയും തമ്മിലുള്ള വ്യാപാര ചർച്ചകൾ പുരോഗമിക്കുന്നതിന്റെ സൂചനയായാണ് ഈ പ്രസ്താവന വിലയിരുത്തപ്പെടുന്നത്. പുതിയ അംബാസഡർ സെർജിയോ ഗോറിന്റെ വരവോടെ ചർച്ചകൾ ശുഭകരമായി തുടരുകയാണെന്നാണ് സൂചന.

അതേസമയം, റഷ്യയുമായുള്ള എണ്ണ വ്യാപാരം ഇന്ത്യ പൂർണ്ണമായും നിർത്തിയോ എന്ന കാര്യത്തിൽ ഇപ്പോഴും അവ്യക്തത നിലനിൽക്കുന്നുണ്ട്. ഇന്ത്യ റഷ്യൻ എണ്ണ വാങ്ങുന്നത് വലിയതോതിൽ കുറച്ചതായി ഡൊണാൾഡ് ട്രമ്പും നേരത്തെ അവകാശപ്പെട്ടിരുന്നു. എന്നാൽ ഇന്ത്യൻ അധികൃതർ ഇതുവരെ ഇക്കാര്യത്തിൽ ഔദ്യോഗിക സ്ഥിരീകരണം നൽകിയിട്ടില്ല. ഒക്ടോബറിൽ സമാനമായ അവകാശവാദം ട്രംപ് ഉന്നയിച്ചപ്പോൾ, അത്തരം ഉറപ്പുകളൊന്നും നൽകിയിട്ടില്ലെന്ന് വ്യക്തമാക്കി ഇന്ത്യ രംഗത്തെത്തിയിരുന്നു. നിലവിലെ സാഹചര്യത്തിൽ, പുതിയ നികുതി ഇളവുകൾ പ്രാബല്യത്തിൽ വരുന്നത് ഇരുരാജ്യങ്ങളും തമ്മിലുള്ള സാമ്പത്തിക ബന്ധം കൂടുതൽ ശക്തമാക്കാൻ സഹായിക്കും.