ഇന്ന് ഉത്രാടം ! ഓണത്തിന്റെ അവസാനവട്ട ഒരുക്കങ്ങള്‍ പൂര്‍ത്തീകരിക്കാന്‍ നാടും നഗരവും ഒരുങ്ങി

ഓണത്തിന്റെ അവസാനവട്ട ഒരുക്കങ്ങള്‍ പൂര്‍ത്തീകരിക്കാന്‍ നാടും നഗരവും ഒരുങ്ങുകയായി. മലയാളി മനസുകളിൽ ഐശ്വര്യത്തിന്റെയും ആഹ്ലാദത്തിന്റെയും ഉത്സവം തീർക്കാൻ വീണ്ടുമൊരു ഉത്രാട ദിനം കൂടി കടന്നെത്തിയിരിക്കുകയാണ്. ഉത്രാട ദിവസമാണ് മലയാളിക്ക് ഒന്നാം ഓണം. നാളെ വിപുലമായി ഓണം ആഘോഷിക്കുന്നതിനുള്ള തയാറെടുപ്പോടു കൂടിയാണ് ഇന്നത്തെ രാവ് ഉണരുന്നത്.

തിരുവോണദിവസം തന്നെയാണ് ആഘോഷത്തിമിർപ്പ് മുഴുവനെങ്കിലും ഉത്രാടത്തിന്റെ അതായത് ഒന്നാം ഓണത്തിന്റെ ആവേശം ഒന്നുവേറെ തന്നെയാണ്. എന്തൊക്കെ ഒരുക്കങ്ങൾ നടത്തിയാലും ഉത്രാട ദിനത്തിൽ മലയാളികളുടെ തയാറെടുപ്പിന് അവസാനമുണ്ടാകില്ല. പൂക്കളം ഒരുക്കുന്നതിനും സദ്യ ഒരുക്കുന്നതിനും വേണ്ടിയുള്ള സാധനങ്ങൾ വാങ്ങാനുള്ള തിരക്കിട്ട ഓട്ടത്തിലാണ് ഈ ദിവസം മലയാളികൾ. ഇതിനെ പൊതുവെ ഉത്രാടപ്പാച്ചില്‍ എന്നാണ് വിളിക്കുന്നത്. കൂടാതെ, ഉത്രാടദിവസത്തെ പൂക്കളത്തിനുമുണ്ട് പ്രത്യേകത. പൂക്കളം ഏറ്റവും വലുതാകുന്ന ദിവസമാണ് ഉത്രാട ദിനം. ഈ ദിവസം ഇഷ്ടമുള്ള പൂക്കള്‍കൊണ്ട് പൂക്കളമൊരുക്കാം. ഉത്രാടപ്പകലാകുമ്പോഴേക്കും തട്ടിന്‍പുറത്ത് നിന്ന് മരംകൊണ്ടുള്ള ഓണത്തപ്പന്‍മാര്‍ താഴെ ഇറങ്ങും. അവരെ തേച്ചുരച്ച് കുളിപ്പിച്ച് നാലുകെട്ടില്‍ നിരത്തി ഇരത്തും. ഞങ്ങളാണ് കാരണവന്‍മാര്‍ എന്ന തികഞ്ഞ ഭാവത്തോടെയിരിക്കുന്ന അവരെ പിറ്റേ ദിവസം വെളുപ്പിന് അരിമാവ് അണിയിച്ച് ചന്ദനക്കുറി തൊടുവിച്ച് തുമ്പക്കുടവും ചെത്തിപ്പൂവും ചൂടിച്ച് കിഴക്കേ മുറ്റത്തും നാലുകെട്ടിലും നടുമുറ്റത്തുമെല്ലാം കുടിയിരുത്തുന്നു.

ഉത്രാടത്തിന് ഏറെ പ്രധാനപ്പെട്ടതാണ് ഉത്രാട വിളക്ക്. തിരുവോണത്തിന് നാലഞ്ച് ദിവസം മുമ്പ് തന്നെ വീട്ടിലെ പാത്രങ്ങളും വിളക്കുകളും മറ്റും തേച്ചു മിനുക്കി വയ്ക്കും. പുളിയും ചാരവുമൊക്കെ ഉപയോഗിച്ചാണ് വൃത്തിയാക്കല്‍ നടത്തുക. ഇങ്ങനെ കഴുകി വൃത്തിയാക്കുന്ന വിളക്കുകളില്‍ വലുത് ഒരെണ്ണമെടുത്ത് ഉത്രാട ദിവസം വൈകുന്നേരം നിറയെ എണ്ണയൊഴിച്ച് കത്തിക്കും. പൂക്കള്‍ ഉപയോഗിച്ച് വിളക്ക് അലങ്കരിക്കുകയും ചെയ്യുന്നു. ഉത്രാട വിളക്കെന്നാണ് ഈ ചടങ്ങിനെ വിളിച്ചു പോരുന്നത്. വിളക്ക് കൊളുത്തുന്നതിനു മുന്നില്‍ ദേവീ-ദേവന്‍മാരുടെ ചിത്രങ്ങള്‍ തുടച്ച് വൃത്തിയാക്കി പൂമാല കെട്ടി വയ്ക്കും. സ്ത്രീകളും കുട്ടികളുമാകും ഇതിനെല്ലാം ചുക്കാന്‍ പിടിക്കുന്നത്.