വടക്കഞ്ചേരി അപകടം: ടൂറിസ്റ്റ് ബസ് ഡ്രൈവറുടെ രക്ത പരിശോധന റിപ്പോർട്ട് പുറത്ത്; ലഹരി സാന്നിധ്യമില്ലെന്ന് വിവരം

കൊച്ചി : വടക്കഞ്ചേരി ടൂറിസ്റ്റ് ബസ് അപകടത്തിലെ പ്രതി ഡ്രൈവർ ജോമോന്റെ രക്ത പരിശോധന റിപ്പോർട്ട് പുറത്ത്. അപകട സമയത്ത് ലഹരി ഉപയോഗിച്ചിരുന്നില്ലെന്നാണ് പരിശോധനാ ഫലം. കാക്കനാട് കെമിക്കൽ ലാബിൻ്റെ പരിശോധനയിലാണ് ഇത് കണ്ടെത്തിയത്.

ഏതെങ്കിലും തരത്തിലുള്ള ലഹരി ഉപയോഗമാണോ അപകടത്തിന് കാരണം എന്ന് കണ്ടെത്താനാണ് രക്തം പരിശോധനക്ക് അയച്ചിരുന്നത്. അതേസമയം ജോമോൻ്റെ രക്തം പരിശോധനയ്ക്ക് അയച്ചത് മണിക്കൂറുകൾ വൈകിയാണെന്ന ആരോപണവും ഉയരുന്നുണ്ട്. വിദ്യാർഥികൾ അടക്കം ഒൻപത് പേരുടെ ജീവനാണ് വടക്കഞ്ചേരി അപകടത്തിൽ പൊലിഞ്ഞത്.

അപകടം ശേഷം ഒളിവിൽ പോയ ജോമോനെ കൊല്ലത്ത് വച്ചാണ് പോലീസ് പിടികൂടിയത്. അപകടം നടക്കുന്ന സമയത്ത് ടൂറിസ്റ്റ് ബസ് അമിത വേഗത്തിലായിരുന്നുവെന്ന് കണ്ടെത്തിയിരുന്നു.