മലയാളക്കരയുടെ പ്രാർത്ഥനയ്ക്ക് ഫലം; വാവ സുരേഷ് തിരികെ ജീവിതത്തിലേയ്ക്ക്; ഇന്ന് ആശുപത്രി വിടും

കോട്ടയം: മലയാളക്കരയുടെ പ്രാർത്ഥനയ്ക്ക് ഫലം. മൂർഖന്റെ കടിയേറ്റ് ചികിത്സയിലുള്ള വാവ സുരേഷിനെ (Vava Suresh) കോട്ടയം മെഡിക്കല്‍ കോളേജില്‍ നിന്ന് ഇന്ന് ഡിസ്ചാര്‍ജ് ചെയ്യും. വാവ സുരേഷിന്റെ ആരോഗ്യ നില പഴയ നിലയിലേക്ക് തിരിച്ചെത്തിയതായി ഡോക്ടര്‍മാര്‍ അറിയിച്ചു. ഇന്നലെ ചേർന്ന മെഡിക്കൽ ബോർഡാണ് ഇത് സംബന്ധിച്ച തീരുമാനം അറിയിച്ചത്. നിലവിൽ മുറിവ് ഉണങ്ങാനുള്ള മരുന്ന് മാത്രമാണ് വാവയ്‌ക്ക് നൽകുന്നതെന്നും മെഡിക്കൽ ബോർഡ് അറിയിച്ചു.

എന്നാൽ അണുബാധക്ക് സാധ്യതയുള്ളതിനാല്‍ വീട്ടിലെത്തിയാലും സൂക്ഷിക്കണമെന്നും സന്ദര്‍ശകരെ ഒഴിവാക്കണമെന്നും നിര്‍ദേശമുണ്ട്. അതേസമയം വാവ സുരേഷിനെ വീട്ടിലേയ്‌ക്ക് കൊണ്ടുപോകാനായി പ്രത്യേക ആംബുലൻസ് സജ്ജമാക്കി. ഡോക്ടർമാർ രണ്ട് മാസത്തെ പൂർണ വിശ്രമം വാവ സുരേഷിന് നിർദ്ദേശിച്ചിട്ടുണ്ട്. ഇത്രയും ദിവസം വെന്റിലേറ്ററിൽ കഴിഞ്ഞതും 65 കുപ്പി ആന്റിവെനം നൽകിയതും ശരീരത്തിന് ക്ഷീണമുണ്ടാക്കിയിട്ടുണ്ട്.

ഈ സാഹചര്യത്തിലാണ് വിശ്രമത്തിന് നിർദ്ദേശം നൽകിയത്. കഴിഞ്ഞ ജനുവരി 31 നാണ് കോട്ടയം കുറിച്ചി നീലംപേരൂരില്‍ വാവ സുരേഷിന് മൂര്‍ഖന്‍ പാമ്പിന്റെ കടിയേറ്റത്. ഗുരുതരാവസ്ഥയില്‍ ആദ്യം കോട്ടയത്തെ സ്വകാര്യ ആശുപത്രിയിലും പിന്നീട് മെഡിക്കല്‍ കോളേജ് ആശുപത്രിയിലേക്കും മാറ്റുകയായിരുന്നു. കൃത്യസമയത്ത് ആശുപത്രിയിൽ എത്തിക്കാൻ കഴിഞ്ഞതും, ആന്റി വെനം നൽകാൻ കഴിഞ്ഞതും വാവയെ തിരികെ ജീവിതത്തിലേയ്ക്ക് കൊണ്ടുവരാൻ സഹായിച്ചു.