വേദ പണ്ഡിതൻ ആചാര്യശ്രീ രാജേഷ് ബെംഗളൂരുവിൽ; ആത്മീയ പ്രഭാഷണങ്ങൾക്കൊരുങ്ങി ഉദ്യാന നഗരം

ബെംഗളൂരു : പ്രമുഖ വേദപണ്ഡിതനും ആചാര്യനുമായ രാജേഷ് വരുന്ന ഞായറാഴ്ച ബെംഗളൂരുവിൽ എത്തുന്നു. നഗരത്തിലെ ആത്മീയ, സാംസ്കാരിക മേഖലക്ക് പുത്തൻ ഉണർവ് നൽകുന്ന ഈ സന്ദർശനത്തിൽ എച്ച്എസ്ആർ സ്വാമി അയ്യപ്പ ക്ഷേത്രത്തിൽ നടന്നു കൊണ്ടിരിക്കുന്ന വേദപഠനത്തിന്റെ ഭാഗമായിട്ടുള്ള വൈദിക സത്സംഗത്തിൽ അദ്ദേഹം പ്രഭാഷണം നടത്തും. സനാതന ധർമ്മത്തിൻ്റെ അടിസ്ഥാന പ്രമാണങ്ങളെക്കുറിച്ചും വേദങ്ങളെക്കുറിച്ചും വൈദിക ആചാരങ്ങളെക്കുറിച്ചും അദ്ദേഹം വിശദീകരിക്കും.
.വേദങ്ങളിലെ അഗാധമായ അറിവുകൾ ലളിതമായ ഭാഷയിൽ സാധാരണക്കാരിലേക്ക് എത്തിക്കുന്നതിൽ പ്രശസ്തനായ വ്യക്തിയാണ് ആചാര്യശ്രീ രാജേഷ്.

കശ്യപ വേദ ഗവേഷണ ഫൗണ്ടേഷന്റെ കുലപതി കൂടിയായ ആചാര്യശ്രീ രാജേഷ്, ജാതി, മത, വർഗഭേദമെന്യേ ആയിരക്കണക്കിന് ആളുകൾക്ക് സനാതന ധർമ്മത്തിൻ്റെ പൊരുൾ പകർന്നു നൽകിയിട്ടുണ്ട്. ഭാരതീയ പാരമ്പര്യത്തിൽ അധിഷ്ഠിതമായ ജീവിതരീതിയെക്കുറിച്ചും ആത്മീയ ഉണർവിനെക്കുറിച്ചും അദ്ദേഹത്തിൻ്റെ വാക്കുകൾ ശ്രോതാക്കൾക്ക് ഉൾക്കാഴ്ച നൽകുമെന്നാണ് പ്രതീക്ഷ.

ബെംഗളൂരുവിലെ ഹൈന്ദവ സമൂഹത്തിന് വേദജ്ഞാനത്തെക്കുറിച്ച് കൂടുതൽ അറിയാനും ആചാര്യശ്രീ രാജേഷിന്റെ വാക്കുകൾ കേൾക്കാനുമുള്ള അസുലഭ അവസരമാണിത്. വിവിധ ആത്മീയ സംഘടനകളുടെയും സാംസ്കാരിക വേദികളുടെയും പ്രതിനിധികൾ പരിപാടികളിൽ പങ്കെടുക്കുമെന്ന് സംഘാടകർ അറിയിച്ചു.