വയനാട് ദുരന്തം ! പതിനൊന്നാം ദിനത്തിലും മൃതദേഹങ്ങൾ കണ്ടെത്തി ; എയര്‍ലിഫ്റ്റ് ചെയ്യാൻ നീക്കം

വയനാട് ഉരുൾപ്പൊട്ടൽ ദുരന്തത്തിന്റെ പതിനൊന്നാം ദിനത്തിലും മൃതദേഹം കണ്ടെത്തി.
സൂചിപ്പാറ-കാന്തന്‍പാറ ഭാഗത്ത് സന്നദ്ധ പ്രവര്‍ത്തകരും രക്ഷാദൗത്യ സംഘവും ചേര്‍ന്ന് നടത്തിയ തെരച്ചിലിലാണ് 4 മൃതദേഹം കണ്ടെത്തി. കണ്ടെത്തിയത് മൂന്ന് മൃതദേഹങ്ങളും ഒരു ശരീര ഭാഗവുമാണ് എന്ന സ്ഥിരീകരിക്കാത്ത വിവരവും വരുന്നുണ്ട്. തിരിച്ചറിയാൻ സാധിക്കാത്ത നിലയിലുള്ള മൃതദേഹങ്ങള്‍ എയര്‍ലിഫ്റ്റ് ചെയ്ത് സുല്‍ത്താല്‍ ബത്തേരിയിലേക്ക് കൊണ്ടുവരും എന്നാണ് വിവരം.

ദുർഗന്ധം അനുഭവപ്പെട്ടതിനെ തുടര്‍ന്ന് മുണ്ടക്കൈ അങ്ങാടിക്ക് സമീപം രണ്ടിടങ്ങളിൽ പരിശോധന നടത്തുകയാണ്. പൊലീസ് നായയെ എത്തിച്ചാണ് പരിശോധന. മണ്ണുമാന്തി യന്ത്രങ്ങളും ഇവിടേക്ക് എത്തിക്കാന്‍ ശ്രമിക്കുകയാണ്. ഉരുള്‍പൊട്ടല്‍ ദുരന്തമുണ്ടായി പതിനൊന്നാം ദിവസമായി ഇന്ന് പ്രദേശത്ത് ജനകീയ തെരച്ചിലാണ് നടക്കുന്നത്. ദുരിതാശ്വാസ ക്യാമ്പുകളിലും ബന്ധു വീടുകളിലും കഴിയുന്നവരെ കൂടി ഉൾപ്പെടുത്തിയുള്ള തെരച്ചിലാണ് ഇന്ന് നടത്തുന്നത്. ഉരുൾപൊട്ടലുണ്ടായ പ്രദേശത്തെ 6 മേഖലകളാക്കി തിരിച്ചാണ് തെരച്ചിൽ നടത്തുന്നത്.