‘നമുക്ക് ഇനി കണ്ണീരില്‍ മുങ്ങിത്താഴാന്‍ ആവില്ല! മുല്ലപ്പെരിയാർ പൊട്ടിയാല്‍ ആര് ഉത്തരം പറയും?’;ആശങ്ക പങ്കുവച്ച് സുരേഷ് ഗോപി

തിരുവനന്തപുരം: മുല്ലപ്പെരിയാര്‍ ഡാമിന്റെ സുരക്ഷയില്‍ ആശങ്ക പങ്കുവച്ച് കേന്ദ്രമന്ത്രി സുരേഷ് ഗോപി. നിലവിലെ അവസ്ഥ ഭീതി പടര്‍ത്തുന്നുവെന്ന് മന്ത്രി പറഞ്ഞു. കോടതിയെ പോലും ശാസ്ത്രീയമായി ബോധിപ്പിക്കണമെങ്കില്‍ സാറ്റലൈറ്റ് സംവിധാനം വേണം. ഡാം പൊട്ടിയാല്‍ ആര് ഉത്തരം പറയും?. ഹൃദയത്തില്‍ ഇടിമുഴക്കം പോലെയാണ് മുല്ലപ്പെരിയാര്‍ നില്‍ക്കന്നത്. നമുക്കിനി കണ്ണീരില്‍ മുങ്ങിത്താഴാന്‍ ആവില്ലെന്നും സുരേഷ് ഗോപി പറഞ്ഞു.

അടുത്തിടെ മുല്ലപ്പെരിയാർ അണക്കെട്ടിന് സമാന രീതിയിൽ നിർമ്മിച്ച തുംഗഭദ്ര അണക്കെട്ടിന്റെ ഷട്ടറുകളിൽ ഒന്ന് തകർന്നിരുന്നു. ഇതിന് പിന്നാലെയാണ് മുല്ലപ്പെരിയാറുമായി ബന്ധപ്പെട്ട ചർച്ചകൾ സമൂഹമാദ്ധ്യമങ്ങളിൽ വീണ്ടും ഉയരാൻ ആരംഭിച്ചത്. സോഷ്യൽ മീഡിയയിൽ ഉൾപ്പെടെ സന്ദേശങ്ങൾ പ്രചരിക്കുന്ന സാഹചര്യത്തിൽ ആശങ്ക വേണ്ടെന്ന് മന്ത്രി കെ. രാജൻ വ്യക്തമാക്കിയിരുന്നു. ഇതിനിടെയാണ് മുല്ലപ്പെരിയാർ ആശങ്ക വേണമെന്ന് സുരേഷ് ഗോപി വ്യക്തമാക്കുന്നത്.