നമ്മുടെ ഒരു ഇഞ്ച് ഭൂമിയും വിട്ടു കൊടുത്തിട്ടില്ല, കൊടുക്കുകയുമില്ല, ലക്ഷ്യം പ്രതിരോധ സ്വയംപര്യാപ്തത! പ്രധാനമന്ത്രി നരേന്ദ്രമോദി

ഗുജറാത്ത് : ദീപാവലി ആഘോഷങ്ങളുടെ ഭാഗമായി സുരക്ഷാ സേനാംഗങ്ങളെ അഭിസംബോധന ചെയ്ത പ്രധാനമന്ത്രി നരേന്ദ്രമോദി, ഭാരതത്തിലെ ഒരു ഇഞ്ച് ഭൂമിയിലും വിട്ടുവീഴ്ച ചെയ്യില്ലെന്ന തന്റെ സർക്കാരിന്റെ ഉറച്ച നിലപാട് ആവർത്തിച്ചു. 21-ആം നൂറ്റാണ്ടിലെ ആവശ്യം മനസ്സിൽ വെച്ച്, സൈന്യത്തെയും സുരക്ഷാ സേനയെയും ആധുനിക സാങ്കേതികവിദ്യകൾ കൊണ്ട് സജ്ജീകരിക്കുകയാണെന്ന് അദ്ദേഹം പറഞ്ഞു.

ആഗോള തലത്തിൽ ഏറ്റവും ആധുനിക സൈനിക ശക്തികളിലേക്ക് രാജ്യത്തെ ഉയർത്താനുള്ള ശ്രമങ്ങളുടെ ഭാഗമായാണ് പ്രതിരോധ മേഖലയിലെ സ്വയംപര്യാപ്തത ലക്ഷ്യമിടുന്നത് എന്നും, ഈ ശ്രമങ്ങൾക്ക് ഇന്ത്യൻ സേനയുടെ പിന്തുണ ആവശ്യമാണെന്നും അദ്ദേഹം കൂട്ടിച്ചേർത്തു. വികസിത ഭാരത് എന്ന ലക്ഷ്യത്തിലേക്ക് നമ്മൾ അതിവേഗം നീങ്ങുമ്പോൾ, നിങ്ങളൊക്കെ ഈ സ്വപ്നത്തിന്റെ സുരക്ഷിതരായ സംരക്ഷകരാണ്,” എന്ന് അദ്ദേഹം പറഞ്ഞു.

അതിർത്തി ടൂറിസം ദേശീയ സുരക്ഷയുടെ നിർണായക വശമാണെന്നും അത് പലപ്പോഴും അവഗണിക്കപ്പെടുന്നുണ്ടെന്നും കച്ചിന് ഈ മേഖലയിൽ കാര്യമായ സാധ്യതകളുണ്ടെന്നും അദ്ദേഹം സൂചിപ്പിച്ചു. ഗുജറാത്തിലെ കച്ചിലെ സർ ക്രീക്ക് ഏരിയയിലെ ലക്കി നാലയിൽ അതിർത്തി സുരക്ഷാ സേന, BSF, ഇന്ത്യൻ സൈന്യം, നേവി, എയർഫോഴ്‌സ് ഉദ്യോഗസ്ഥരോടൊപ്പം ദീപാവലി ആഘോഷിക്കുമ്പോൾ, രാഷ്ട്രത്തിന്റെ സുരക്ഷയും പ്രതിരോധ സ്വയംപര്യാപ്തതയും ഉറപ്പാക്കാനുള്ള സർക്കാർ നടപടികളെയും അദ്ദേഹം വിശദീകരിച്ചു.