“അമ്മ മലയാളത്തിന്റെ അമ്മ; മാതൃത്വത്തിന്റെ മൂർത്തരൂപം” – കവിയൂര്‍ പൊന്നമ്മയുടെ നിര്യാണത്തിൽ അനുശോചിച്ച് പശ്ചിമബംഗാൾ ഗവർണർ ഡോ സി.വി ആനന്ദബോസ്

കൊൽക്കത്ത: പ്രശസ്തനടി കവിയൂര്‍ പൊന്നമ്മയുടെ നിര്യാണത്തിൽ അനുശോചിച്ച് പശ്ചിമബംഗാൾ ഗവർണർ ഡോ സി.വി ആനന്ദബോസ്. അമ്മ മലയാളത്തിന്റെ അമ്മയായിരുന്നു കവിയൂർ പൊന്നമ്മയെന്നും മലയാളികളുടെ മനസ്സിൽ കേവലം ഒരു അഭിനേത്രിയല്ല, മാതൃത്വത്തിന്റെ മൂർത്തരൂപമായിരുന്നു അവരെന്നും ആനന്ദബോസ് അനുസ്മരിച്ചു.

അമ്മ വേഷങ്ങളിലൂടെ മലയാളികളുടെ മനസ്സിൽ തന്റേതായ സ്ഥാനം ഉണ്ടാക്കിയെടുത്ത നടി കവിയൂര്‍ പൊന്നമ്മ കൊച്ചിയിലെ സ്വകാര്യ ആശുപത്രിയില്‍ വാര്‍ധക്യ സഹജമായ അസുഖത്തെ തുടര്‍ന്ന് ചികിത്സയിരിക്കെ ഇന്ന് വൈകുന്നേരമാണ് അന്തരിച്ചത്. 79 വയസായിരുന്നു.

നാന്നൂറിലധികം സിനിമകളിൽ ചെറുതും വലുതുമായ വേഷങ്ങൾ കൈകാര്യം ചെയ്തു. മലയാളം സിനിമയിലെ എല്ലാ തലമുറകൾക്കുമൊപ്പം പ്രവർത്തിക്കാൻ സാധിച്ച അപൂർവ്വം അഭിനേത്രികളിൽ ഒരാളാണ് കവിയൂർ പൊന്നമ്മ. കെപിഎസി നാടകങ്ങളില്‍ അഭിനയിച്ചായിരുന്നു തുടക്കം. 1962 മുതല്‍ സിനിമയില്‍ സജീവമായി. നാല് തവണ മികച്ച രണ്ടാമത്തെ നടിക്കുള്ള സംസ്ഥാന പുരസ്കാരം നേടിയിരുന്നു. നിരവധി സിനിമകളില്‍ ഗായികയായും തിളങ്ങിയിരുന്നു.