വിന്‍ഡീസ് ടീമിലെ അഞ്ച് അംഗങ്ങള്‍ക്ക് കൂടി കോവിഡ്; പാക് പരമ്പര റദ്ദാക്കും ?

കറാച്ചി: പാകിസ്താനില്‍ പര്യടനം നടത്തുന്ന വെസ്റ്റ് ഇന്‍ഡീസ് ( West Indies) ക്രിക്കറ്റ് ടീമിലെ മൂന്ന് കളിക്കാരും സപ്പോര്‍ട്ട് സ്റ്റാഫിലെ രണ്ട് പേർക്കും കോവിഡ് സ്ഥിരീകരിച്ചു. വെസ്റ്റിൻഡീസ് താരങ്ങളായ ഷായ് ഹോപ്പ്, അകീൽ ഹുസൈൻ, ജസ്റ്റിൻ ഗ്രീവ്സ് എന്നിവർക്കും സഹ പരിശീലകൻ റോഡി എസ്റ്റ്‌വിക്ക്, ടീം ഫിസിഷ്യൻ ഡോ. അക്ഷയ് മാൻസിങ് എന്നിവർക്കാണ് പുതിയതായി കോവിഡ് സ്ഥിരീകരിച്ചത്.

ഇതോടെ പാക്കിസ്ഥാനിലെ വിന്‍ഡീസ് പര്യടനം നടക്കുമോ എന്ന കാര്യം സംശയത്തിൽ. ഒരു ടി20യും 3 ഏകദിനങ്ങളുമാണ് ഇനി പരമ്പരയിൽ അവശേഷിക്കുന്നത്. പുതിയ കേസുകള്‍ ഉള്‍പ്പെടെ ടീമില്‍ കോവിഡ് ബാധിച്ചവരുടെ എണ്ണം ഒന്‍പതായി. വെസ്റ്റിൻഡീസ് താരങ്ങളായ ഷെൽഡൺ കോട്രൽ, റോസ്റ്റൺ ചേസ്, കൈൽ മയേഴ്സ് എന്നിവർക്ക് മുൻപുതന്നെ കോവിഡ് സ്ഥിരീകരിച്ചിരുന്നു.

അതേസമയം വെസ്റ്റിൻഡീസ് ടീമിലെ എല്ലാ അംഗങ്ങളെയും കോവിഡ് പരിശോധനയ്ക്കു വിധേയരാക്കി ഫലം നെഗറ്റീവാണെന്ന് ഉറപ്പാക്കിയശേഷം മാത്രമേ പരമ്പരയുമായി മുന്നോട്ടു പോകുന്ന കാര്യം തീരുമാനിക്കൂ.