ഇതെന്തൊരു തീറ്റ !! ജഗന്‍മോഹന്‍ റെഡ്ഢിയും കൂട്ടരും ഓഫീസിലിരുന്ന് കഴിച്ചത് 3.62 കോടി രൂപയുടെ മുട്ട പഫ്സ്

ആന്ധ്രാപ്രദേശ് : അഞ്ചുവർഷം കൊണ്ട് ആന്ധ്രാപ്രദേശ് മുൻ മുഖ്യമന്ത്രി വൈഎസ് ജഗന്‍മോഹന്‍ റെഡ്ഢിയും കൂട്ടരും ഓഫീസിലിരുന്ന് കഴിച്ചത് 3.62 കോടി രൂപയുടെ മുട്ട പഫ്സ്. ഒരു ദിവസം അകത്താക്കിയത് 993 മുട്ട പഫ്സ് ആണെന്നാണ് കണക്കുകൾ പറയുന്നത്. ഇത് എന്തൊരു തീറ്റയെന്നാണ് ഇപ്പോള്‍ മുന്‍ മുഖ്യമന്ത്രിയുടെ കാലത്തെ സാമ്പത്തിക ക്രമക്കേടുകള്‍ അന്വേഷിക്കാനിറങ്ങിയ ഉദ്യോഗസ്ഥരുടെ സംശയം.

അതേസമയം, ഓഫീസിലെ ലഘുഭക്ഷണത്തിനായി ചെലവഴിച്ച തുക പെരുപ്പിച്ച് കാണിച്ച് ജഗന്‍ മോഹനെ അപമാനിക്കാനാണ് ശ്രമമെന്ന് ആരോപിച്ച് വൈഎസ്ആര്‍ കോണ്‍ഗ്രസ് രംഗത്ത് വന്നിട്ടുണ്ട്. 2014-19 കാലയളവില്‍ ചന്ദ്രബാബു നായിഡുവിനും മകന്‍ ലോകേഷിനും ലഘുഭക്ഷണം നല്‍കുന്നതിനായി സര്‍ക്കാര്‍ 8.5 കോടി ചെലവഴിച്ചെന്നൊരു പ്രതിരോധവും വൈഎസ്ആര്‍ കോണ്‍ഗ്രസ് ഉയര്‍ത്തുന്നുണ്ട്. എന്നാല്‍ ഈ ആരോപണം തികച്ചും വ്യാജമാണെന്ന് ടിഡിപി എക്സില്‍ പോസ്റ്റ് ചെയ്തു.