‘എന്തൊരു രാത്രി, എന്തൊരു തിരിച്ചുവരവ്’…! ടി20 ലോകകപ്പ് കിരീടം നേടിയ ക്രിക്കറ്റ് താരങ്ങൾക്ക് ആശംസകളുമായി മലയാളത്തിന്റെ താരരാജാക്കന്മാർ

ടി-20 ലോകകപ്പ് മത്സരത്തിൽ ഇന്ത്യൻ ടീം നേടിയ ചരിത്ര വിജയത്തിൽ ആശംസകൾ അറിയിച്ച് മലയാള സിനിമാ ലോകത്തെ സൂപ്പർ താരങ്ങളായ മമ്മൂട്ടിയും മോഹൻലാലും. ഇന്ത്യൻ ടീമിന്റെ ചിത്രം പങ്കുവച്ചുകൊണ്ട് ഫെയ്സ്ബുക്കിലൂടെയാണ് ഇരുവരും ആശംസകൾ അറിയിച്ചത്.

ഐസിസി ട്രോഫിക്കായുള്ള ഇന്ത്യയുടെ 11 വർഷത്തെ കാത്തിരിപ്പ് ഇതോടെ അവസാനിക്കുകയാണ്. അവിശ്വസനീയമായ ടീം വർക്കിലൂടെയാണ് ഇന്ത്യ വിജയ കിരീടം ചൂടിയത്. വിരാട് കോഹ്‌ലിയുടെയും അക്സർ പട്ടേലിന്റെയും നിർണായകമായ പങ്കാളിത്തം, ജസ്പ്രീത് ബുംറയുടെ അത്ഭുതകരമായ പ്രകടനം. അവസാന പന്ത് വരെ ആവേശം കൊള്ളിച്ച മത്സരമായിരുന്നു. ഇവരെ ഓർത്ത് അഭിമാനിക്കാതിരിക്കാൻ കഴിയില്ല എന്ന് മോ​ഹൻലാൽ ഫെയ്സ്ബുക്കിൽ കുറിച്ചു.

വിജയ കിരീടം ചൂടിയ ഇന്ത്യൻ ടീമിന് ആശംസകളെന്ന് മമ്മൂട്ടിയും ഫെയ്സ്ബുക്കിലൂടെ അറിയിച്ചു. എന്തൊരു രാത്രി, എന്തൊരു തിരിച്ചുവരവ്. ഇന്ത്യ വീണ്ടും ലോക ചാമ്പ്യന്മാരായിരിക്കുന്നു. മുഴുവൻ ടീമിനും അഭിനന്ദനങ്ങളെന്ന് മമ്മൂട്ടി ഫെയ്സ്ബുക്കിൽ കുറിച്ചു.