മേരി എവിടെ? അജ്ഞാതർ രണ്ടരവയസുകാരിയെ കടത്തികൊണ്ടുപോയത് അതീവ സുരക്ഷയുള്ള മേഖലയില്‍ നിന്ന്; സിസിടിവി ക്യാമറകൾ പലതും പ്രവർത്തനക്ഷമം അല്ലെന്ന് അധികൃതർ; കുട്ടിക്കായി പ്രാർത്ഥനയോടെ സംസ്ഥാനം !

തിരുവനന്തപുരം: തലസ്ഥാനത്ത് രണ്ടരവയസുകാരിക്കായി വ്യാപക അന്വേഷണം. തിരുവനന്തപുരം പേട്ട ഓള്‍ സെയിന്‍റ്സ് കോളേജിന് സമീപം താമസിച്ചിരുന്ന നാടോടി ദമ്പതികളുടെ രണ്ടരവയസുകാരി മകള്‍ മേരിയെയാണ് തട്ടികൊണ്ടുപോയത്. മഞ്ഞ സ്‌കൂട്ടറിൽ എത്തിയവർ എടുത്തുകൊണ്ടുപോയി എന്നാണ് കുട്ടിയുടെ സഹോദരന്‍റെ മൊഴി.

അതീവ സുരക്ഷയുള്ള മേഖലയില്‍ നിന്നാണ് സഹോദരങ്ങൾക്കൊപ്പം ഉറങ്ങിക്കിടന്ന കുട്ടിയെ അജ്ഞാതർ തട്ടിക്കൊണ്ടുപോയിരിക്കുന്നത്. തൊട്ടടുത്ത് വിമാനത്താവളവും ബ്രഹ്മോസുമുണ്ട്. പ്രധാന പാതയോട് ചേർന്നുള്ള സ്ഥലത്ത് വെച്ചാണ് കുഞ്ഞിനെ കാണാതായത്. ചാക്കയില്‍ നിന്ന് വിമാനത്താവളത്തിലേക്കുള്ള വഴിയില്‍ ധാരാളം സിസിടിവികളുണ്ട്. എന്നാല്‍ റോഡ് പണി നടക്കുന്നതിനാല്‍ പലതും പ്രവർത്തനക്ഷമം അല്ല.

തിരുവനന്തപുരത്ത് ഏറ്റവുമധികം അന്യസംസ്ഥാന തൊഴിലാളികളുള്ള സ്ഥലമാണിത്. മറ്റ് ജില്ലകളിലെ റെയില്‍വേ സ്റ്റേഷനുകളും കേന്ദ്രീകരിച്ച് പോലീസ് അന്വേഷിക്കുകയാണ്. അന്യസംസ്ഥാന തൊഴിലാളികളെ കേന്ദ്രീകരിച്ചും അന്വേഷണം നടക്കുന്നുണ്ട്. അതിർത്തികളടക്കം അടച്ച് അരിച്ചുപെറുക്കിയുള്ള അന്വേഷണത്തിലാണ് പോലീസ്.