മോദിയ്ക്ക് പിൻഗാമിയാര് ? ജനങ്ങൾ ആഗ്രഹിക്കുന്ന അടുത്ത പ്രധാനമന്ത്രി ഈ നേതാവ് ; സർവേഫലം പുറത്ത്

ദില്ലി : തുടർച്ചയായ മൂന്നാം തവണയും പ്രധാനമന്ത്രിയായി ചരിത്രത്തിൽ ഇടം പിടിച്ച് ജൈത്രയാത്ര തുടരുകയാണ് പ്രധാനമന്ത്രി നരേന്ദ്രമോദി. നരേന്ദ്രമോദിക്ക് വയസ് എഴുപത്തഞ്ചിനോട് അടുക്കുന്നതിനാൽ അദ്ദേഹത്തിന്റെ പിൻഗാമിയായി ഇനി ആരെന്ന ചോദ്യം പല കോണുകളിൽ നിന്നും ഉയർന്നുകേൾക്കുന്നുണ്ട്. ഇപ്പോഴിതാ ഇത് സംബന്ധിച്ച ഒരു സർവേ നടത്തിയിരിക്കുകയാണ് ദേശീയ മാദ്ധ്യമമായ ഇന്ത്യ ടുഡേ.

സർവേയിൽ ആഭ്യന്തരമന്ത്രി അമിത്ഷായാണ് മുന്നിൽ നിൽക്കുന്നത്. മോദിക്ക് പകരക്കാരനാവാൻ അമിത്ഷാ മാത്രമാണ് യോഗ്യനെന്ന് കരുതുന്നവർ ഇരുപത്തഞ്ചുശതമാനം പേരാണ്. സർവേയിൽ ദക്ഷിണേന്ത്യയിലാണ് അമിത് ഷായ്ക്ക് ഏറ്റവും കൂടുതൽ പിന്തുണ ലഭിച്ചിരിക്കുന്നത്. ദക്ഷിണേന്ത്യയിലെ സർവേയിൽ 31 ശതമാനം വോട്ടുകൾ അമിത് ഷാ നേടിയിട്ടുണ്ട്. അതേസമയം, രണ്ടാമതായി ഉത്തർപ്രദേശ് മുഖ്യമന്ത്രി യോഗി ആദിത്യനാഥും മൂന്നാമതായി നിതിൻ ഗഡ്കരിയുമാണ് സർവേയിൽ സ്ഥാനം പിടിച്ചിരിക്കുന്നത്. 19 ശതമാനം ആളുകളാണ് യോഗി ആദിത്യനാഥിനെ പിന്തുണയ്ക്കുന്നത്. 13 ശതമാനം ആളുകൾ നിതിൻ ഗഡ്കരിയെയും പിന്തുണയ്ക്കുന്നു. കൂടാതെ, അഞ്ചു ശതമാനം വീതം വോട്ടുകൾ നേടി പ്രതിരോധ മന്ത്രി രാജ്നാഥ് സിങും കൃഷി മന്ത്രി ശിവരാജ് സിങ് ചൗഹാനും പട്ടികയിൽ ഇടംനേടിയിട്ടുണ്ട്.