ബംഗ്ലാദേശിലേക്ക് മടങ്ങിയെത്തും !! പ്രതികാരം ചെയ്യും ; യൂനുസ് സർക്കാരിന് മുന്നറിയിപ്പുമായി ഷെയ്ഖ് ഹസീന

ധാക്ക: ബംഗ്ലാദേശിലേക്ക് മടങ്ങിയെത്തുമെന്നും എല്ലാവര്‍ക്കും നീതി ഉറപ്പാക്കുമെന്നും പ്രതികാരം ചെയ്യുമെന്നും ബംഗ്ലാദേശ് മുന്‍ പ്രധാനമന്ത്രി ഷെയ്ഖ് ഹസീന. ബംഗ്ലാദേശിലെ ഇടക്കാല സര്‍ക്കാരിന്റെ നേതാവ് മുഹമ്മദ് യൂനുസ് ഗുണ്ടാത്തലവനാണെന്നും ഭീകരവാദികളെ സ്വതന്ത്രമായി വിഹരിക്കാന്‍ അനുവദിച്ചിരിക്കുകയാണെന്നും രാജ്യത്ത് അരാജകത്വം വളര്‍ത്തുകയാണെന്നും ഷെയ്ഖ് ഹസീന ആരോപിച്ചു. കലാപത്തില്‍ കൊല്ലപ്പെട്ട നാല് പോലീസുകാരുടെ വിധവകളുമായി സൂം മീറ്റിങ്ങിൽ സംസാരിക്കുമ്പോഴാണ് യൂനുസിനെ വിമർശിച്ചത്. ക്രിമിനലുകളുടെ തലവൻ എന്നര്‍ഥമുള്ള ‘മോബ്സ്റ്റർ’ എന്ന പദമാണ് യൂനുസിനെ വിശേഷിപ്പിക്കാൻ ഹസീന ഉപയോഗിച്ചത്. യൂനുസ് രാജ്യത്ത് ഭീകരരെ അഴിച്ചുവിടുകയാണെന്നും അവർ ആരോപിച്ചു. രാജ്യത്ത് അധർമ്മം വളർത്തുന്നതിൽ യൂനുസ് പ്രധാന പങ്കാണ് വഹിക്കുന്നത്.

രാജ്യത്ത് മടങ്ങിയെത്തിയാലുടന്‍ ആവശ്യമായ നഷ്ടപരിഹാരനടപടികള്‍ സ്വീകരിക്കുമെന്ന് ഉറപ്പുനല്‍കുകയും ചെയ്തു. തന്നെ അധികാരത്തില്‍നിന്ന് പുറത്താക്കാനുള്ള ഗൂഢാലോചനയുടെ ഭാഗമായാണ് രാജ്യത്ത് അക്രമങ്ങള്‍ അരങ്ങേറിയതെന്നും പോലീസുകാര്‍ക്ക് ജീവന്‍ നഷ്ടമാകാനിടയായതെന്നും അവര്‍ ആരോപിച്ചു. അന്വേഷണസമിതികളെ പിരിച്ചുവിട്ട മുഹമ്മദ് യൂനുസിന്റെ നടപടിയെ ഹസീന വിമർശിച്ചു. ജനങ്ങളെ കശാപ്പുചെയ്യാന്‍ ഭീകരരെ ഇടക്കാലസര്‍ക്കാര്‍ കയറൂരി വിട്ടിരിക്കുകയാണെന്നും ബംഗ്ലാദേശിനെ തകര്‍ക്കുകയാണെന്നും അവര്‍ ആരോപിച്ചു.ബംഗ്ലാദേശിന്റെ മണ്ണില്‍ത്തന്നെ യൂനുസിനേയും കൂട്ടാളികളേയും കൊണ്ട് തങ്ങളുടെ ചെയ്തികള്‍ക്ക് മറുപടി പറയിക്കുമെന്നും ഷെയ്ഖ് ഹസീന പറഞ്ഞു.