ധനമന്ത്രി അവതരിപ്പിക്കുക സാമ്പത്തിക കമ്മി 4 ശതമാനത്തിലേക്ക് താഴ്ത്താനുള്ള കർമ്മപദ്ധതി? ; സാമ്പത്തിക അച്ചടക്കവും വികസന കുതിപ്പും ലക്ഷ്യം; രാജ്യം ആകാംക്ഷയിൽ

ദില്ലി : തുടർച്ചയായി ഒമ്പതാം തവണയും കേന്ദ്ര ബജറ്റ് അവതരിപ്പിച്ച് ധനമന്ത്രി നിർമല സീതാരാമൻ ഇന്ന് ചരിത്രം കുറിക്കും. സ്വതന്ത്ര ഇന്ത്യയുടെ ചരിത്രത്തിൽ ആദ്യമായി ഒരു ഞായറാഴ്ച ബജറ്റ് അവതരിപ്പിക്കപ്പെടുന്നു എന്ന പ്രത്യേകതയും ഇത്തവണയുണ്ട്. രാവിലെ 11 മണിക്ക് ലോക്‌സഭയിലാണ് ബജറ്റ് അവതരണം ആരംഭിക്കുക. കഴിഞ്ഞ നാല് വർഷത്തെപ്പോലെ ഇത്തവണയും പേപ്പർരഹിത ബജറ്റാണ് ധനമന്ത്രി അവതരിപ്പിക്കുന്നത്. കൊളോണിയൽ കാലത്തെ ബ്രീഫ്‌കേസ് മാറ്റി ‘ബഹി-ഖാത’ (പരമ്പരാഗത ചുവന്ന തുണിയിൽ പൊതിഞ്ഞ പുസ്തകം) കൊണ്ടുവന്ന നിർമല സീതാരാമൻ, ഇത്തവണ ഡിജിറ്റൽ ടാബ്‌ലെറ്റിലൂടെയാണ് രാജ്യത്തിന്റെ സാമ്പത്തിക നയങ്ങൾ പ്രഖ്യാപിക്കുന്നത്.

സാമ്പത്തിക കമ്മി കുറയ്ക്കുക എന്നതിനാണ് ഇത്തവണ സർക്കാർ പ്രഥമ പരിഗണന നൽകുന്നത്. 2025-26 സാമ്പത്തിക വർഷത്തിൽ ജിഡിപിയുടെ 4.4 ശതമാനമായി നിശ്ചയിച്ചിരുന്ന സാമ്പത്തിക കമ്മി ലക്ഷ്യം നേടാൻ സർക്കാരിന് സാധിച്ചിരുന്നു. വരാനിരിക്കുന്ന വർഷത്തിൽ ഇത് 4 ശതമാനത്തിലേക്ക് താഴ്ത്താനുള്ള കർമ്മപദ്ധതി ബജറ്റിലുണ്ടാകുമെന്നാണ് സാമ്പത്തിക വിദഗ്ധരുടെ വിലയിരുത്തൽ. സ്വകാര്യ നിക്ഷേപങ്ങൾ മന്ദഗതിയിലായ സാഹചര്യത്തിൽ, അടിസ്ഥാന സൗകര്യ വികസനത്തിനായുള്ള മൂലധനച്ചെലവ് 10 മുതൽ 15 ശതമാനം വരെ വർദ്ധിപ്പിക്കാൻ സാധ്യതയുണ്ട്. ഇതോടെ മൂലധനച്ചെലവ് 12 ലക്ഷം കോടി രൂപയ്ക്കും മുകളിലെത്തിയേക്കാം.

നികുതി വരുമാനത്തിന്റെ കാര്യത്തിൽ 42.7 ലക്ഷം കോടി രൂപയുടെ സമാഹരണമാണ് സർക്കാർ ലക്ഷ്യമിടുന്നത്. ഇതിൽ 25.2 ലക്ഷം കോടി രൂപ നേരിട്ടുള്ള നികുതികളിൽ നിന്നും 17.5 ലക്ഷം കോടി രൂപ പരോക്ഷ നികുതികളിൽ നിന്നുമാണ് പ്രതീക്ഷിക്കുന്നത്. ജിഎസ്ടി (GST) വരുമാനത്തിൽ 11 ശതമാനം വർദ്ധനവ് ബജറ്റ് പ്രവചിക്കുന്നു. ശമ്പളക്കാർക്ക് ആദായനികുതിയിൽ കൂടുതൽ ഇളവുകൾ ലഭിക്കുമോ എന്നും കേരളം അടക്കമുള്ള സംസ്ഥാനങ്ങൾക്കായി പ്രത്യേക പാക്കേജുകൾ പ്രഖ്യാപിക്കുമോ എന്നും രാജ്യം ഉറ്റുനോക്കുന്നു. ലോകത്തെ ഏറ്റവും വേഗത്തിൽ വളരുന്ന സമ്പദ്‌വ്യവസ്ഥ എന്ന പദവി നിലനിർത്താനാവശ്യമായ വൻ പ്രഖ്യാപനങ്ങൾ ബജറ്റിലുണ്ടാകുമെന്നാണ് വിപണിയുടെ പ്രതീക്ഷ.