ജനിച്ചമണ്ണിൽ നിന്നും ആയിരങ്ങളെ കുടിയിറക്കിയ കണ്ണീരിന്റെ ഗന്ധമുള്ള കരിനിയമത്തിന് ഒടുവിൽ അന്ത്യം? അനായാസം ലോക്‌സഭ കടക്കുന്ന ബില്ലിന് രാജ്യസഭയിൽ പ്രതിപക്ഷം തടയിടുമോ? ബില്ല് നിയമമാക്കാൻ മോദി സർക്കാരിന്റെ തന്ത്രങ്ങൾ ഇങ്ങനെ

ദില്ലി: ജനിച്ച മണ്ണിൽ നിന്ന് ആയിരങ്ങളെ കുടിയിറക്കിയ കണ്ണീരിന്റെ ഗന്ധമുള്ള കരിനിയമമാണ് നിലവിലെ വഖഫ് നിയമം. മുനമ്പത്തടക്കം രാജ്യത്ത് പതിനായിരങ്ങൾ സമരരംഗത്താണ്. മതനിയമത്തിനെ ഇന്ത്യൻ നിയമത്തിലേക്ക് ഒളിച്ചുകടത്തിയ ദിനങ്ങളെ തള്ളിപ്പറഞ്ഞ് രാഷ്ട്രം സാമൂഹിക നീതിയുടെ പുതിയ അദ്ധ്യായം തുറക്കുകയാണ്. മുസ്ലിങ്ങളുടെ മതവിശ്വാസങ്ങളിലേക്ക് കടന്നുകയറുന്ന ബില്ലെന്നാണ് പ്രതിപക്ഷത്തിന്റെ നിലപാട്. പ്രതിപക്ഷ കക്ഷികളുടെ രാഷ്ട്രീയ നിലപാടുകളെ വഖഫ് നിയമ ഭേദഗതി ബിൽ എങ്ങനെ മറികടക്കും എന്ന് ഉറ്റുനോക്കുകയാണ് രാഷ്ട്രം.

ലോക്‌സഭയിൽ 293 അംഗങ്ങളുടെ പിന്തുണയുള്ള സർക്കാരിന് ബിൽ പാസാക്കുക കഠിനമല്ല. എന്നാലും പ്രതിപക്ഷത്തെ വിശ്വാസത്തിലെടുത്ത് നിയമനിർമ്മാണം നടത്താനാണ് സർക്കാർ ശ്രമം. ബിൽ പാർലമെന്റിന്റെ സംയുക്ത സമിതിക്ക് വിട്ടതും അതുകൊണ്ടാണ്. ബില്ലിനെക്കുറിച്ച് എൻ ഡി എയിൽ ഭിന്നതയില്ല എന്നാണ് സൂചന. ബില്ലിനെ അനുകൂലിക്കുന്നതായി ചന്ദ്രബാബു നായിഡു അറിയിച്ചുകഴിഞ്ഞു. ബിഹാർ മുഖ്യമന്ത്രി നിതീഷ് കുമാർ ഇതുവരെ നിലപാട് പരസ്യമായി പറഞ്ഞിട്ടില്ല. ഭരണമുന്നണിയിലെ വിള്ളലുണ്ടാക്കാനാണ് പ്രതിപക്ഷത്തിന്റെ ശ്രമം. എന്നാൽ ബില്ലിന് അനുകൂലമായ ക്രിസ്ത്യൻ സഭകളുടെ നിലപാട് കോൺഗ്രസിനെ പ്രതിസന്ധിയിലാക്കിയിട്ടുണ്ട്.

മണി ബിൽ അല്ലാത്തതിനാൽ വഖഫ് ബിൽ രാജ്യസഭയിലും പാസാകേണ്ടതുണ്ട്. എൻ ഡി എ യ്ക്ക് രാജ്യസഭയിലും ബിൽ പാസാക്കാനുള്ള ഭുരിപക്ഷമുണ്ട് 245 അംഗ സഭയിൽ എൻ ഡി എയ്ക്ക് 125 അംഗങ്ങളുടെ പിന്തുണയുണ്ട്. പക്ഷെ അവിടെയും 4 അംഗങ്ങളുള്ള ജനതാദൾ യു നിലപാട് നിർണ്ണായകമാകും. ബില്ലിന് അനുകൂലമായി എൻ ഡി എ ഘടകകക്ഷികൾ ഒറ്റക്കെട്ടാണ് എന്നാണ് സൂചന. എന്നാൽ പ്രതിപക്ഷ നിരയിലെ ചില പാർട്ടികളും ബില്ലിനെ അനുകൂലിച്ചേക്കാമെന്നും സൂചനയുണ്ട്. അങ്ങനെയെങ്കിൽ ബില്ലിനെതിരെയുള്ള പ്രതിപക്ഷ നിലപാട് ചീറ്റിപ്പോകാനാണ് സാധ്യത.