നിരണത്ത് യുവതിയെയും മക്കളെയും കാണാതായിട്ട് രണ്ടാഴ്ച; ഭർത്താവിനെ തൂങ്ങിമരിച്ച നിലയിൽ കണ്ടെത്തി

നിരണം സ്വദേശിനി റീനയെയും (40) രണ്ട് മക്കളെയും കാണാതായി രണ്ടാഴ്ച തികയുന്നതിനിടെ ഭർത്താവ് അനീഷ് മാത്യുവിനെ (41) മരിച്ചനിലയിൽ കണ്ടെത്തി. ഇന്ന് വൈകുന്നേരം നാലരയോടെ കവിയൂർ ഞാലിക്കണ്ടത്തെ കുടുംബവീട്ടിലാണ് അനീഷിനെ തൂങ്ങിമരിച്ചനിലയിൽ കണ്ടെത്തിയത്. റീനയെയും മക്കളായ അക്ഷര (8), അൽക്ക എന്നിവരെയും ഓഗസ്റ്റ് 17 മുതലാണ് കാണാതായത്.

റീനയുടെ കുടുംബത്തിന്റെ പരാതിയെത്തുടർന്ന് പോലീസ് കേസെടുക്കുകയും അന്വേഷണത്തിനായി പ്രത്യേകസംഘത്തെ നിയോഗിക്കുകയും ചെയ്തിരുന്നു. റീനയും മക്കളും ബസിൽ യാത്രചെയ്യുന്നതിന്റെയും റോഡിലൂടെ നടന്നുപോകുന്നതിന്റെയും സി.സി.ടി.വി. ദൃശ്യങ്ങൾ പോലീസിന് ലഭിച്ചിരുന്നെങ്കിലും ദിവസങ്ങൾ പിന്നിട്ടിട്ടും കണ്ടെത്താനായിരുന്നില്ല. ഇതിനിടെയാണ് അനീഷിന്റെ മരണം.

റീനയുടെയും മക്കളുടെയും തിരോധാനവുമായി ബന്ധപ്പെട്ട് അനീഷിനെ ദിവസവും ചോദ്യം ചെയ്യലിനായി പോലീസ് വിളിപ്പിച്ചിരുന്നതായി ബന്ധുക്കൾ ആരോപിച്ചു. പോലീസിൽനിന്നുള്ള മാനസിക പീഡനമാണ് ആത്മഹത്യയിലേക്ക് നയിച്ചതെന്നും ഇവർ പറയുന്നു. അതേസമയം, റീനയെ കാണാതായി രണ്ടുദിവസം കഴിഞ്ഞാണ് അനീഷ് തങ്ങളെ വിവരമറിയിച്ചതെന്ന് റീനയുടെ കുടുംബം ആരോപിച്ചിരുന്നു. ഇതിനെത്തുടർന്ന് റീനയുടെ സഹോദരനാണ് പുളിക്കീഴ് പോലീസ് സ്റ്റേഷനിൽ പരാതി നൽകിയത്. അനീഷിനും റീനയ്ക്കും ഇടയിൽ നേരത്തെ കുടുംബപ്രശ്നങ്ങളുണ്ടായിരുന്നതായും ബന്ധുക്കൾ ഇടപെട്ട് ഇത് പരിഹരിച്ചിരുന്നതായും പറയുന്നു.