യുവതിയുടെ ഫോട്ടോയും നമ്പറും അശ്ലീല സൈറ്റിൽ അപ്‌ലോഡ് ചെയ്ത സംഭവം ; പ്രതിയെന്ന് സംശയിക്കുന്ന യുവാവിന്റെ വീട്ടില്‍ തെളിവെടുപ്പ് നടത്തി പോലീസ്, ലാപ്ടോപ്പും മൊബൈലും പിടിച്ചെടുത്തു

തിരുവനന്തപുരം: അശ്ലീല സൈറ്റിൽ യുവതിയുടെ ഫോട്ടോയും ഫോൺ നമ്പറും അപ്‌ലോഡ് ചെയ്ത സംഭവത്തിൽ പ്രധാന പ്രതിയെന്ന് സംശയിക്കുന്ന യുവാവിന്റെ വീട്ടില്‍ പോലീസ് തെളിവെടുപ്പ് നടത്തി. യുവാവിന്റെ വീട്ടിൽ നിന്നും ലാപ്‌ടോപ്പും മൊബൈല്‍ ഫോണുകളും പോലീസ് പിടിച്ചെടുത്തു. ഇവ പരിശോധിക്കാൻ ഫോറന്‍സിക് വിദഗ്ധര്‍ക്ക് കൈമാറി.

യുവാവിന്റെ വീട്ടിലെത്തി പോലീസും സൈബര്‍ വിദഗ്ധരും നടത്തിയ രണ്ടര മണിക്കൂര്‍ നീണ്ട തെളിവെടുപ്പിനു ശേഷമാണ് കമ്പ്യൂട്ടർ ഹാർഡ് ഡിസ്ക് ഉൾപ്പെടെയുള്ള ഉപകരണങ്ങള്‍ കണ്ടെടുത്തതും അവ പരിശോധനക്കായി കൊണ്ടുപോയതും. . സംഭവത്തില്‍ എട്ടുപേര്‍ക്കെതിരെ കാട്ടാക്കട പോലീസ് എഫ് ഐ.ആര്‍ ഇട്ടിരുന്നു. ഇവരിൽ ഒരാളാണ് തന്റെ ഫോട്ടോയും നമ്പറും സൈറ്റിൽ അപ്‌ലോഡ് ചെയ്തതെന്ന് യുവതി പരാതിയിൽ പറയുന്നുണ്ട്. ഇവർ എട്ടുപേരുടെയും മൊബൈൽ ഫോണുകൾ പോലീസ് കസ്റ്റഡിയിലാണ്. വിശദമായ പരിശോധനയ്ക്ക് ശേഷമേ ഇവരിൽ ആരാണ് പ്രതിയെന്ന് കണ്ടെത്താനാവു എന്നാണ് പോലീസ് പറയുന്നത്.