സ്ത്രീധനമായി 117 പവൻ സ്വർണവും 32 ലക്ഷം രൂപയും നൽകിയിട്ടും കുറഞ്ഞുപോയെന്ന പേരിൽ നിരന്തരം മർദ്ദനം; മറ്റൊരു യുവതിയുമായി പ്രണയം; കന്യാകുമാരിയിൽ യുവഡോക്ടർ അറസ്റ്റിൽ

സ്ത്രീധനം കുറഞ്ഞുപോയെന്ന് ആരോപിച്ച് ഭാര്യയെ വർഷങ്ങളോളം പീഡിപ്പിക്കുകയും മർദ്ദിക്കുകയും ചെയ്ത യുവ സർക്കാർ ഡോക്ടർ അറസ്റ്റിൽ. കന്യാകുമാരി ജില്ലയിലെ എളക്കോട് സര്‍ക്കാര്‍ ആശുപത്രിയിലെ ഡോക്ടർ 36 കാരനായ അനൂപ് ആണ് അറസ്റ്റിലായത്.

ഇയാളുടെ ഭാര്യയും ഈറോഡ് സര്‍ക്കാര്‍ ആശുപത്രിയിലെ ഡോക്ടറുമായ ദിവ്യ സറോണ നൽകിയ പരാതിയുടെ അടിസ്ഥാനത്തിലാണ് അറസ്റ്റ്.

2010 ലായിരുന്നു ഇരുവരുടെയും വിവാഹം. വിവാഹത്തിന് 117 പവന്‍ സ്വര്‍ണവും 32 ലക്ഷം രൂപയും സ്ത്രീധനമായി നൽകിയിരുന്നു. എന്നാൽ, ഇത് കുറഞ്ഞു പോയെന്നും പറഞ്ഞ് ഭർത്താവ് യുവതിയെ നിരന്തരം മർദ്ദിക്കുമായിരുന്നു.

സ്ത്രീധന തുക പോരാതെ 10 ലക്ഷം രൂപ കൂടി നൽകണമെന്നായിരുന്നു ഇയാളുടെ ആവശ്യം. ഒരു വർഷത്തോളം ഇരുവരും മാറിത്താമസിച്ചുവെങ്കിലും കാര്യങ്ങൾക്ക് മാറ്റമുണ്ടായില്ല.

എന്നാൽ ഇതിനിടയില്‍ അനൂപ് ബാങ്ക് ലോക്കറില്‍ സൂക്ഷിച്ചിരുന്ന സ്വര്‍ണം ദിവ്യ അറിയാതെ എടുക്കയും ചെയ്തു. മറ്റൊരു വനിതാ ഡോക്ടറുമായി അനൂപ് അടുപ്പത്തിലാവുകയും ചെയ്തു.

ഇതോടെയാണ്, ദിവ്യ പരാതി നൽകാൻ തീരുമാനിച്ചത്. പോലീസിൽ പരാതിപ്പെട്ടെങ്കിലും അവർ കാര്യമായി എടുത്തില്ല. ഇതോടെ, ദിവ്യസറോണ ചെന്നൈ ഹൈക്കോടതിയെ സമീപിച്ചു.

തുടർന്ന് കോടതിയില്‍ നിന്ന് ദിവ്യക്ക് അനുകൂലമായ വിധി വന്നതോടെ ഈറോഡ് വനിതാ പോലീസ് അനൂപിനെ അറസ്റ്റ് ചെയ്യുകയായിരുന്നു.