ഇത് മുതലെടുപ്പ് ചൈന; നടക്കില്ലെന്ന് ഇന്ത്യ

മുംബൈ: കൊവിഡ് കാലത്തെ ഓഹരി മൂല്യശോഷണം മുതലെടുത്ത് ഇന്ത്യന്‍ വിപണിയില്‍ പിടിമുറുക്കാനുള്ള ചൈനയുടെ മോഹങ്ങള്‍ക്ക് തിരിച്ചടി. ചൈനീസ് കമ്പനികളുടെ ഇന്ത്യന്‍ വിപണിയിലെ നിക്ഷേപത്തെക്കുറിച്ച് അന്വേഷിക്കാനുളള കേന്ദ്ര സര്‍ക്കാരിന്റെയും സെബിയുടെയും നീക്കമാണ് ചൈനയ്ക്ക് പ്രതിസന്ധിയായിരിക്കുന്നത്. നേരിട്ടും പരോക്ഷമായും ഇന്ത്യന്‍ കമ്പനികളില്‍ നിക്ഷേപം നടത്തുന്നതിന് കേന്ദ്രസര്‍ക്കാരിന്റെ അനുമതി തേടേണ്ടത് ഇതോടെ നിര്‍ബന്ധമാകും.

ചൈനീസ് കമ്പനികളുടെ ഇന്ത്യന്‍ വിപണിയിലെ നിക്ഷേപത്തെക്കുറിച്ച് സെബിയുടെ (സെക്യൂരിറ്റീസ് ആന്‍ഡ് എക്‌സ്‌ചേഞ്ച് ബോര്‍ഡ് ഓഫ് ഇന്ത്യ) അന്വേഷണം പുരോഗമിക്കുകയാണ്. താല്‍ക്കാലികമായി ഇത്തരം നിക്ഷേപങ്ങള്‍ക്ക് സെബി നിയന്ത്രണം ഏര്‍പ്പെടുത്തിയിരിക്കുകയാണ്.

കൊവിഡ് കാലത്തെ അവസരം മുതലാക്കി ചൈനീസ്, ഹോങ്കോങ് തുടങ്ങിയ മേഖലകളില്‍ നിന്ന് ഇന്ത്യന്‍ കമ്പനികളെ ലക്ഷ്യമിട്ട് നിക്ഷേപം എത്തുന്നതായുളള റിപ്പോര്‍ട്ടുകള്‍ ആശങ്കയുളവാക്കുന്നതാണെന്ന് സാമ്പത്തിക വിദഗ്ധര്‍ നേരത്തെ അഭിപ്രായപ്പെട്ടിരുന്നു.

അതേസമയം ചൈനയില്‍ നിന്ന് വന്‍ തോതില്‍ നിക്ഷേപം സ്വീകരിച്ചിരിക്കുന്ന ബിഗ് ബാസ്‌ക്കറ്റ്, പേടിഎം, ഓല, എന്നീ കമ്പനികള്‍ക്കും ചൈനീസ് മുന്‍നിര നിക്ഷേപകരായ അലിബാബ, ടെന്‍സെന്റ് എന്നിവര്‍ക്കും ഈ നീക്കം തിരിച്ചടിയായേക്കും.