ഇന്ന് സംസ്ഥാനത്ത് 9 പേർക്ക് കോവിഡ് സ്ഥിരീകരിച്ചു

തിരുവനന്തപുരം: സംസ്ഥാനത്ത് ഇന്ന് 9 പേര്‍ക്ക് കോവിഡ് 19 സ്ഥിരീകരിച്ചു. ഇതില്‍ മൂന്ന് പേര്‍ നിസാമുദ്ദീന്‍ മതസമ്മേളനത്തില്‍ പങ്കെടുത്ത് തിരിച്ചെത്തിയവരാണെന്ന് മുഖ്യമന്ത്രി പിണറായി വിജയൻ പറഞ്ഞു. ആകെ 295പേര്‍ക്കു രോഗം സ്ഥിരീകരിച്ചു. 206 വിദേശത്തുനിന്നെത്തിയവരാണ്. ഏഴ് പേര്‍ വിദേശികളാണ്. 14 പേര്‍ക്ക് രോ​ഗം ഭേദമായി. 1,69997 പേരാണ് നിരീക്ഷണത്തിലുള്ളത്. ഇതില്‍ 1,69291 പേര്‍ വീടുകളിലാണ്. 706പേര്‍ ആശുപത്രികളിലാണ്. ഇന്ന് മാത്രം 154 പേരെ ആശുപത്രിയില്‍ പ്രവേശിപ്പിച്ചു.9139 സാംപിളുകള്‍ പരിശോധനയ്ക്ക് അയച്ചെന്നും 8126പേരുടെ ഫലം നെ​ഗറ്റീവാണെന്നും മുഖ്യമന്ത്രി പിണറായി വിജയന്‍ വാര്‍ത്താ സമ്മേളനത്തില്‍ പറഞ്ഞു. അതേസമയം റാന്നിയില്‍ കൊവിഡ് ബാധിച്ച വൃദ്ധദമ്ബതികള്‍ ആശുപത്രിവിട്ടത് ആശ്വാസകരമെന്ന് മുഖ്യമന്ത്രി പറഞ്ഞു.ഇത് ആരോഗ്യപ്രവര്‍ത്തകരുടെ മികവാണെന്നും അദ്ദേഹം വ്യക്തമാക്കി.

കേരളത്തില്‍ കൂടുതല്‍ പേര്‍ക്ക് കൊവിഡ് 19 പിടിപെടാതിരിക്കാന്‍ കടുത്ത ജാഗ്രത വേണമെന്നും എല്ലാവരും മാസ്‌ക് ധരിക്കുന്നത് വ്യാപകമാക്കണമെന്നും മുഖ്യമന്ത്രി അറിയിച്ചു. മാസ്‌ക് ധരിക്കേണ്ടത് ഇന്നത്തെ ഘട്ടത്തില്‍ പൊതുവെ എല്ലാവരും സ്വീകരിക്കേണ്ട ജാഗ്രതാ നടപടിയാണ്, ഇത് സംബന്ധിച്ച്‌ കൃത്യമായ ബോധവത്കരണം സമൂഹത്തില്‍ വേണമെന്നും അദ്ദേഹം വ്യക്തമാക്കി.

ലോകത്താകെ കോവിഡ് രോഗം പടരുന്ന സാഹചര്യത്തിൽ ഏറ്റവും കൂടുതല്‍ രോഗം ബാധിച്ചവര്‍ യുഎസിലാണ്. 1,87,302 പേര്‍ക്ക് അവിടെ രോഗം ബാധിച്ചു. 3846 പേര്‍ മരിച്ചു. ഇറ്റലിയില്‍ 1,10,574 പേര്‍ക്കാണ് രോഗം ബാധിച്ചത്. 13,157 പേര്‍ മരിച്ചു. രോഗ വ്യാപനത്തിന്റെ ഗൗരവം ന്യൂയോര്‍ക്കിന്റെ അവസ്ഥ പരിശോധിച്ചാല്‍ മനസ്സിലാകും. വികസനംകൊണ്ടും സമ്പത്തുംകൊണ്ടും ഉയരങ്ങളില്‍നില്‍ക്കുന്ന പല നാടുകളെയും കോവിഡ് ബാധിച്ചിരിക്കുന്നു. ഇത്തരമൊരു സാഹചര്യത്തില്‍ വേണം കേരളം കോവിഡിനെ പ്രതിരോധിക്കുന്നതിനെ വിലയിരുത്തേണ്ടത്.