എതിരാളികൾ വരെ നെറ്റ്ഫ്ലിക്സിന് മുന്നിൽ!

രാഷ്ട്രീയ വൈര്യവും, അതിർത്തികളിലെ ചോരക്കളികളും, വർഷങ്ങളായി തുടരുന്ന ശത്രുതയും. പരസ്പരം കണ്ണിൽ കണ്ടാൽ ചോര തിളയ്ക്കുന്ന രാജ്യങ്ങൾ! പക്ഷേ, ഇപ്പോൾ ഒരു ഇസ്രായേലി വെബ് സീരീസിന് മുൻപിൽ ആ അറബ് രാജ്യങ്ങൾ ഒന്നടങ്കം ഇരുന്ന് കണ്ണെടുക്കാതെ കാണുകയാണ്! അതെ, നെറ്റ്ഫ്ലിക്സിൽ റിലീസ് ചെയ്ത് വെറും 48 മണിക്കൂറിനുള്ളിൽ ലോകത്തെ ആകെ അമ്പരപ്പിച്ച ഒരു കാഴ്ചയ്ക്കാണ് നമ്മൾ സാക്ഷ്യം വഹിക്കുന്നത്. ഇസ്രായേലി ഹിറ്റ് ത്രില്ലർ സീരീസായ ‘ഫൗദ’യുടെ അഞ്ചാം സീസൺ ഇപ്പോൾ ആഗോളതലത്തിൽ തരംഗമാവുകയാണ്!വെറും രണ്ട് ദിവസം! അതിനുള്ളിൽ 43-ലധികം രാജ്യങ്ങളിലെ ടോപ്പ് 10 ട്രെൻഡിംഗ് ലിസ്റ്റിലാണ് ഈ ഇസ്രായേലി ഷോ ഇടംപിടിച്ചത്. എന്നാൽ നമ്മളെ ശരിക്കും ഞെട്ടിക്കുന്ന കാര്യം എന്തെന്നറിയാമോ? ഇസ്രായേലിൽ മാത്രമല്ല, ഇസ്രായേലിന്റെ പ്രധാന ശത്രുരാജ്യമായ ലെബനനിലും ഫൗദ ഇപ്പോൾ നമ്പർ വൺ ആണ്! അവിടെയും തീർന്നില്ല, അറബ് ലോകത്തെ പ്രമുഖ രാജ്യങ്ങളായ യു.എ.ഇയിലും ജോർദാനിലും ആറാം സ്ഥാനം. ബഹ്‌റൈൻ, ഖത്തർ എന്നിവിടങ്ങളിൽ എട്ടാം സ്ഥാനം.

കൂടാതെ ഈജിപ്ത്, തുർക്കി, മൊറോക്കോ, ഒമാൻ തുടങ്ങിയ രാജ്യങ്ങളിലും ടോപ്പ് 10 ലിസ്റ്റിൽ ഫൗദ മുന്നേറുകയാണ്. ഇസ്രായേലുമായി ഔദ്യോഗികമായി വലിയ രാഷ്ട്രീയ ഭിന്നതകളുള്ള രാജ്യങ്ങളിൽ പോലും ജനങ്ങൾ ഈ സീരീസ് നെഞ്ചിലേറ്റുന്നു എന്നത് ചെറിയൊരു കാര്യമല്ല!സത്യത്തിൽ ഈ അഞ്ചാം സീസൺ നമ്മുടെ മുന്നിലെത്താൻ വൈകിയതിന് പിന്നിൽ വലിയൊരു കഥയുണ്ട്. ഇസ്രായേലി മുൻ കമാൻഡോ ലിയോർ റാസും മാധ്യമപ്രവർത്തകനായ അവീ ഇസാചറോഫും ചേർന്ന് ഈ സീസണിന്റെ സ്ക്രിപ്റ്റ് നേരത്തെ തന്നെ എഴുതി പൂർത്തിയാക്കിയതായിരുന്നു.എന്നാൽ 2023 ഒക്ടോബർ 7-ൽ ആക്രമണം നടന്നു. ആ ഒരു സംഭവത്തോടെ അവർ എഴുതിവെച്ച പഴയ കഥ മുഴുവൻ പൂർണ്ണമായി കീറിയെറിഞ്ഞു! ആ ഭീകരാക്രമണവും, അതിനുശേഷമുണ്ടായ യുദ്ധവും, ആ അക്രമങ്ങൾ ഉണ്ടാക്കിയ മാനസിക ആഘാതങ്ങളും അടിസ്ഥാനമാക്കി കഥ വീണ്ടും ആദ്യവസാനം മാറ്റി എഴുതി.

അങ്ങനെയാണ് 11 എപ്പിസോഡുകളുള്ള ഈ പുതിയ സീസൺ ജനങ്ങളിലേക്ക് എത്തുന്നത്.
എന്തുകൊണ്ടാണ് ‘ഫൗദ’ ഇത്രയധികം ആളുകളെ ആകർഷിക്കുന്നത്? ‘ഫൗദ’ എന്ന അറബിക് വാക്കിന്റെ അർത്ഥം ‘അരാജകത്വം’ എന്നാണ്. മിഡിൽ ഈസ്റ്റിലെ സംഘർഷങ്ങളെ വെറുമൊരു ഗുണമാദോഷ കഥയായിട്ടല്ല ഈ സീരീസ് കാണിക്കുന്നത്. പകരം, ഇരുപക്ഷത്തെയും മനുഷ്യരുടെ വൈകാരികമായ തലങ്ങളെയും, ഭയത്തെയും, രഹസ്യ ഓപ്പറേഷനുകളുടെ ക്രൂരമായ യാഥാർത്ഥ്യങ്ങളെയും റിയലിസ്റ്റിക്കായി സ്ക്രീനിൽ എത്തിക്കുന്നു എന്നതാണ് ഇതിന്റെ പ്രത്യേകത.മുൻപ് പല ഘട്ടങ്ങളിലും വലിയ വിമർശനങ്ങളും ബഹിഷ്കരണ ആഹ്വാനങ്ങളും നേരിട്ട സീരീസ് കൂടിയാണിത്. എന്നിട്ടും, പുതിയ സീസൺ വന്നപ്പോൾ അറബ് ലോകമടക്കം ഇതിന് മുന്നിൽ ക്ലിക്കാവുന്നു എങ്കിൽ, അതിന് ഒരൊറ്റ കാരണമേയുള്ളൂ — ഇതിന്റെ മേക്കിംഗും ആരെയും തളച്ചിടുന്ന സ്റ്റോറിടെല്ലിംഗും!