കറന്റ് കട്ടോ… കേരളത്തിന്റെ ‘പവർ’ കട്ടോ?

കേരളത്തിലെ Gen Zയും ട്രോളന്മാരും ഇപ്പോൾ ഏറ്റവും കൂടുതൽ കൈകാര്യം ചെയ്യുന്ന ഒരു വിഷയം എന്താണെന്ന് ചോദിച്ചാൽ അതിനുള്ള ഉത്തരം
വൈദ്യുതിയെന്നാണ്..ചൂട് കൂടിയ സമയത്ത് ഒരു നിമിഷം ഫാൻ നിന്നാൽ പോലും നമ്മൾ ആദ്യം നോക്കുന്നത് ഫാനിനെയല്ല…ജനലിനെയാണ് കാരണം എവിടെയെങ്കിലും കാറ്റുണ്ടോ എന്നാണ് നോക്കുന്നത്. ഫാൻ പോയി… കറന്റ് പോയി… Wi-Fi പോയി…അപ്പോൾ മലയാളിയുടെ ജീവിതത്തിൽ പിന്നെ ബാക്കിവരുന്നത് എന്താണ്?മെഴുകുതിരിയും മൊബൈൽ ഫോണിന്റെ ടോർച്ചും.

ഇപ്പോൾ തോന്നുന്നത് കേരളം പതുക്കെ ‘ഡിജിറ്റൽ കേരളത്തിൽ’ നിന്ന് ‘മെഴുകുതിരി കേരളത്തിലേക്ക്’ പോകുന്നു എന്നാണ്.കാരണം ഇപ്പോഴത്തെ പ്രധാന ചർച്ച തന്നെ വൈദ്യുതി നിയന്ത്രണമാണ്. മഴ കുറവ്, ജലവൈദ്യുത പദ്ധതികളിലെ ഉൽപ്പാദനക്കുറവ്, പുറത്തുനിന്ന് വൈദ്യുതി വാങ്ങേണ്ട സാഹചര്യം… ഇങ്ങനെ പല കാരണങ്ങളാണ് സർക്കാർ വിശദീകരിക്കുന്നത്.പക്ഷേ ഇവിടെ ഒരു ചെറിയ ചോദ്യം ചോദിക്കാതെ പോകാൻ പറ്റില്ല.ഈ കറന്റ് കട്ട് ശരിക്കും ഒഴിവാക്കാൻ കഴിയാത്ത സാഹചര്യമാണോ?വൈദ്യുതി മേഖലയിൽ നേരത്തെ വേണ്ടത്ര ആസൂത്രണം ചെയ്യാത്തതിന്റെ ഫലമാണോ?ഇതാണ് ഇപ്പോൾ ജനങ്ങൾക്കിടയിലെ പ്രധാന സംശയം. കാരണം കറന്റ് പോകുമ്പോൾ അതിന്റെ ബുദ്ധിമുട്ട് അനുഭവിക്കുന്നത് മന്ത്രിയോ ഉദ്യോഗസ്ഥനോ അല്ല. മറിച്ച് നമ്മളാണ്.രാവിലെ സ്കൂളിലേക്ക് പോകുന്ന കുട്ടികൾ,ഓഫീസിലേക്ക് പോകുന്നവർ,ചെറുകിട വ്യാപാരികൾ,വീട്ടിൽ നിന്ന് ജോലി ചെയ്യുന്നവർ…രാത്രിയിൽ പഠിക്കുന്ന വിദ്യാർത്ഥികൾ,വൈദ്യുതിയെ ആശ്രയിക്കുന്ന ആരോഗ്യ ഉപകരണങ്ങൾ ഉപയോഗിക്കുന്നവരാണ്.പ്രത്യേകിച്ച് ഈ ചൂടിന്റെ സമയത്ത്. പകൽ കറന്റ് പോയാൽ ഫാൻ ഇല്ല,രാത്രി കറന്റ് പോയാൽ ഉറക്കം ഇല്ല

രണ്ട് മണിക്കൂർ കറന്റ് പോയാൽ മലയാളിയുടെ അടുത്ത ചോദ്യങ്ങൾ.‘KSEB-യുടെ app-ൽ എന്തെങ്കിലും notification വന്നോ?’ അടുത്തത് WhatsApp.പിന്നെ Facebook.പിന്നെ നാട്ടിലെ ഗ്രൂപ്പ്.‘ഇനി മൂന്ന് മണിക്കൂർ കറന്റ് വരില്ല.’അത് കേട്ടതോടെ നമ്മുടെ വീട്ടിൽ emergency meeting!
‘ഫോൺ charge ചെയ്തോ?’‘Power bank ഉണ്ടോ?’‘മെഴുകുതിരി എവിടെ?’‘ടോർച്ച് ആരുടെ കൈയിലാണ്?’പക്ഷേ തമാശയ്ക്കപ്പുറം വിഷയം ഗൗരവമുള്ളതാണ്.വൈദ്യുതി ഒരു സാധാരണ സൗകര്യമല്ല.ഇന്നത്തെ ജീവിതത്തിൽ വിദ്യാഭ്യാസം മുതൽ ആരോഗ്യരംഗം വരെ, വ്യാപാരം മുതൽ വീടുകളിലെ അടിസ്ഥാന ആവശ്യങ്ങൾ വരെ എല്ലാം വൈദ്യുതിയെ ആശ്രയിച്ചാണ്.അതുകൊണ്ട് ‘വൈദ്യുതി സൂക്ഷിച്ച് ഉപയോഗിക്കണം’ എന്ന സർക്കാർ നിർദേശം തീർച്ചയായും ജനങ്ങൾ ഗൗരവമായി കാണണം.പക്ഷേ അതോടൊപ്പം സർക്കാർ സംവിധാനത്തോട് ഒരു ചോദ്യം ജനങ്ങൾക്ക് ചോദിക്കാം.വൈദ്യുതി പ്രതിസന്ധി വരുമെന്ന് മുൻകൂട്ടി കണക്കാക്കിയിരുന്നോ?കണക്കാക്കിയിരുന്നെങ്കിൽ എന്തായിരുന്നു തയ്യാറെടുപ്പ്?മഴ കുറയാനുള്ള സാധ്യതയുണ്ടെങ്കിൽ അതിന് അനുസരിച്ചുള്ള വൈദ്യുതി സംഭരണവും വാങ്ങലും നേരത്തെ നടത്തിയിരുന്നോ?പുറത്തുനിന്ന് വൈദ്യുതി വാങ്ങേണ്ടി വന്നാൽ അതിന്റെ സാമ്പത്തിക ബാധ്യത എത്രയാണ്?ഇതെല്ലാം ജനങ്ങൾക്ക് വ്യക്തമായി അറിയേണ്ടതുണ്ട്.കാരണം ‘മഴ കിട്ടിയില്ല’ എന്ന് പറഞ്ഞാൽ മാത്രം വിഷയം തീരുന്നില്ല.മഴ കുറയുന്നത് സർക്കാരിന്റെ നിയന്ത്രണത്തിലുള്ള കാര്യമല്ല.

പക്ഷേ മഴ കുറയുമ്പോൾ വൈദ്യുതി എങ്ങനെ ഉറപ്പാക്കണം എന്നുള്ള ആസൂത്രണം സർക്കാരിന്റെ ഉത്തരവാദിത്തമാണ്.ഇവിടെയാണ് യഥാർത്ഥ ചർച്ച തുടങ്ങുന്നത്.ഇതിൽ ആരാണ് കുറ്റക്കാരൻ എന്നതിലുപരി…പരിഹാരം എന്താണ്?ഇതാണ് ജനങ്ങൾ അറിയാൻ ആഗ്രഹിക്കുന്നത്.കാരണം ഇന്ന് കറന്റ് കട്ട്.നാളെ വീണ്ടും കറന്റ് കട്ട്.മറ്റന്നാൾ വീണ്ടും കറന്റ് കട്ട്.അങ്ങനെ പോയാൽ…കറന്റ് ബില്ലിനൊപ്പം മെഴുകുതിരി ബില്ലും ബജറ്റിൽ ഉൾപ്പെടുത്തേണ്ടി വരുമോ? ഇനി മറ്റൊരു കാര്യം.‘വൈദ്യുതി അമൂല്യമാണ്, സൂക്ഷിച്ച് ഉപയോഗിക്കണം’ എന്ന സന്ദേശം ജനങ്ങൾ അംഗീകരിക്കും.
വൈദ്യുതി പാഴാക്കാതിരിക്കുക എന്നത് ഓരോരുത്തരുടെയും ഉത്തരവാദിത്തമാണ്.പക്ഷേ അതുപോലെ തന്നെ വൈദ്യുതി വിതരണം സ്ഥിരതയോടെ ഉറപ്പാക്കുക എന്നത് സംവിധാനത്തിന്റെയും സർക്കാരിന്റെയും ഉത്തരവാദിത്തമാണ്.ഇരുവശത്തും ഉത്തരവാദിത്തം വേണം.ജനങ്ങൾ വൈദ്യുതി ലാഭിക്കണം.സർക്കാർ ദീർഘകാല ആസൂത്രണം നടത്തണം.ആവശ്യത്തിന് വൈദ്യുതി ലഭ്യമാക്കാനുള്ള സംവിധാനങ്ങൾ ശക്തിപ്പെടുത്തണം.അല്ലെങ്കിൽ ഓരോ വേനലിലും നമ്മൾ ഒരേ ചോദ്യം തന്നെ ചോദിച്ചുകൊണ്ടിരിക്കും.ഇനി എപ്പോഴാണ് കറന്റ് വരുന്നത്?’അതേസമയം സോഷ്യൽ മീഡിയയിൽ ട്രോളന്മാർ ഇതിനകം ചോദിച്ചു തുടങ്ങിയിട്ടുണ്ട്…കേരളം വൈദ്യുതി പ്രതിസന്ധി മറികടക്കുമോ?’അതിന് ഉത്തരം കിട്ടുന്നതിന് മുമ്പ് മറ്റൊരു ചോദ്യം കൂടി വരും.ഫാൻ എപ്പോഴാണ് തിരികെ വരുന്നത്?’ കാരണം രാഷ്ട്രീയ ചർച്ചയും സാമ്പത്തിക ചർച്ചയും എല്ലാം നടക്കട്ടെ.പക്ഷേ ചൂടിൽ കിടക്കുന്ന സാധാരണക്കാരന് ആദ്യം വേണ്ടത് ഒറ്റ കാര്യമല്ലേ…ഫാൻ ഒന്ന് കറങ്ങണം!അതിനാൽ ഈ വിഷയത്തിൽ ജനങ്ങൾ ചോദിക്കേണ്ടത് ആരുടെ വാക്കാണ് ശരിയെന്ന് മാത്രമല്ല.കണക്കുകൾ എന്താണ് പറയുന്നത്?വൈദ്യുതി പ്രതിസന്ധിയുടെ യഥാർത്ഥ കാരണം എന്താണ്?ഇത് എത്രകാലം തുടരും?ഇനി വീണ്ടും ഇത്തരം പ്രതിസന്ധി വരാതിരിക്കാൻ എന്താണ് ദീർഘകാല പരിഹാരം?ഇതാണ് പ്രധാനപ്പെട്ടത്.കാരണം.മെഴുകുതിരി കത്തിച്ച് ഒരു രാത്രി കഴിച്ചുകൂട്ടാം.പക്ഷേ ഒരു സംസ്ഥാനത്തിന്റെ വൈദ്യുതി പ്രതിസന്ധിക്ക്,മെഴുകുതിരി കൊണ്ട് പരിഹാരം കാണാൻ കഴിയില്ല.