തമിഴ്‌നാട്ടിൽ പത്തുവയസുകാരിയെ ലൈംഗികമായി പീഡിപ്പിച്ചു; നൂറ്റിമൂന്നുകാരന് 10 വർഷം തടവ് വിധിച്ച് വിചാരണ കോടതി

ചെന്നൈ: പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിൽ നൂറ്റിമൂന്നുകാരന് ശിക്ഷ വിധിച്ച് വിചാരണ കോടതി. കുട്ടികൾക്കെതിരായ ലൈംഗികാതിക്രമങ്ങൾ തടയൽ (പോക്‌സോ) നിയമപ്രകാരമാണ് പ്രതിയായ പരശുരാമനെ പോലീസ് അറസ്റ്റ് ചെയ്തത്. ചൈന്നെ തിരുവള്ളൂരിലെ മഹിളാ കോടതിയിലാണ് കേസിന്റെ വിചാരണ നടന്നത്. കേസിൽ പ്രതി കുറ്റക്കാരനാണെന്ന് കണ്ടെത്തിയ കോടതി 10 വർഷം കഠിനതടവും 5,000 രൂപ പിഴയും പ്രതിയ്ക്ക് വിധിച്ചു. പെൺകുട്ടിക്ക് 45,000 രൂപ നഷ്ടപരിഹാരം നൽകാനും കോടതി ഉത്തരവിട്ടു.

തമിഴ്‌നാട്ടിൽ ചെന്നൈയുടെ പ്രാന്തപ്രദേശത്തുള്ള പൂനമല്ലിയിലെ സെൻനീർകുപ്പത്താണ് സംഭവം നടന്നത്. സർക്കാർ സ്‌കൂളിലെ പ്രധാനാധ്യാപകനായി വിരമിച്ച കെ പരശുരാമൻ 2018 ജൂലായ് 7ന് പെൺകുട്ടിയെ ലൈംഗികമായി പീഡിപ്പിച്ചതായാണ് പരാതി. ഇയാളുടെ വീടിനടുത്ത് വാടകയ്ക്ക് താമസിക്കുകയാണ് പെൺകുട്ടിയുടെ കുടുംബം. പെൺകുട്ടിയെ ചോക്ലേറ്റ് നൽകി വീട്ടിൽ എത്തിച്ച ഇയാൾ ലൈംഗികമായി പീഡിപ്പിക്കുകയായിരുന്നു. തുടർന്ന് അതിഭയങ്കരമായ വയറുവേദനയെക്കുറിച്ച് പെൺകുട്ടി വീട്ടിൽ അറിയിച്ചപ്പോഴാണ്, പെൺകുട്ടിയുടെ മാതാപിതാക്കൾ സംഭവത്തെക്കുറിച്ച് അറിയുന്നത്. പരശുരാമൻ തന്നെ ചോക്ലേറ്റ് നൽകി വീട്ടിൽ കൊണ്ടുപോയി പീഡിപ്പിക്കുകയായിരുന്നുവെന്ന് പെൺകുട്ടി തുറന്നു പറയുകയായിരുന്നു.