ഹോളി ആഘോഷങ്ങളുടെ മറവിൽ കഞ്ചാവ് വിൽപ്പന; കളമശ്ശേരി ഗവ. പോളിടെക്‌നിക്‌ കോളേജ് ഹോസ്റ്റലിൽ നിന്ന് വൻ കഞ്ചാവ് ശേഖരം പിടിച്ചു; എസ് എഫ് ഐ നേതാവ് അടക്കം മൂന്ന് വിദ്യാർത്ഥികൾ അറസ്റ്റിൽ

കൊച്ചി: കളമശ്ശേരി ഗവ. പോളിടെക്‌നിക് ഹോസ്റ്റലിൽ നിന്ന് വൻ കഞ്ചാവ് ശേഖരം പിടികൂടി. രഹസ്യ വിവരം കിട്ടിയതിനെ തുടർന്ന് പോലീസും ഡാൻസാഫ് സംഘവും നടത്തിയ പരിശോധനയിലാണ് കഞ്ചാവ് ശേഖരം പിടികൂടിയത്. എസ് എഫ് ഐ നേതാവായ കോളേജ് യൂണിയൻ ജനറൽ സെക്രട്ടറിയടക്കം മൂന്ന് വിദ്യാർത്ഥികൾ പിടിയിലായി. ഇതിൽ രണ്ട് വിദ്യാർത്ഥികളെ സ്റ്റേഷൻ ജാമ്യത്തിൽ വിട്ടയച്ചു. കസ്റ്റഡിയിലുള്ള വിദ്യാർത്ഥിയിൽ നിന്ന് 2 കിലോ കഞ്ചാവാണ് പിടികൂടിയത്.

ഹോളി ആഘോഷത്തിന്റെ മറവിൽ വിദ്യാർത്ഥികളിൽ നിന്ന് പണം പിരിച്ചാണ് കഞ്ചാവ് ക്യാമ്പസ്സിൽ എത്തിച്ചത്. ഓരോ വിദ്യാർത്ഥിയിൽ നിന്ന് 500 മുതൽ 2000 രൂപവരെ പിരിച്ചിരുന്നു. കൊച്ചിയിലെ ഇടനിലക്കാർ മുഖേനയാണ് കഞ്ചാവ് എത്തിച്ചതെന്നാണ് സൂചന. വിവരം പൊലീസിന് ചോർന്ന് കിട്ടിയിരുന്നു. ഏഴു മണിക്കൂർ നീണ്ട പോലീസ് പരിശോധനയിലാണ് ലഹരി പിടിച്ചെടുത്തത്. ചില്ലറ വിൽപ്പന നടത്താനാണ് ലക്ഷ്യമിട്ടിരുന്നത്. ഇതിനായി തൂക്ക് മെഷീൻ സഹിതം എത്തിച്ചിരുന്നു.

ലഹരി ഇടപാടിനെതിരെ നേരത്തെ പോലീസിൽ പരാതി നൽകിയിരുന്നതായി കോളേജ് പ്രിൻസിപ്പൽ അറിയിച്ചു. പരാതിയുടെ അടിസ്ഥാനത്തിൽ വിവരങ്ങൾ ശേഖരിച്ച് പരിശോധന നടത്തുകയായിരുന്നുവെന്ന് ജില്ലാ പോലീസ് മേധാവിയും അറിയിച്ചു. ഒരാഴ്‌ചയായി കോളേജിലെ ചില വിദ്യാർത്ഥികൾ പോലീസിന്റെ നിരീക്ഷണത്തിലായിരുന്നു. സംസ്ഥാനത്തെ ഒരു പ്രമുഖ സർക്കാർ കോളേജിൽ നിന്ന് തന്നെ വൻതോതിൽ ലഹരി പിടിച്ചെടുത്തതും ഭരണാനുകൂല വിദ്യാർത്ഥി സംഘടനാ നേതാവ് പിടിയിലായതും സർക്കാറിനെ പ്രതിരോധത്തിലാക്കിയിട്ടുണ്ട്.