3.62 കോടി ചെലവിട്ട കായിക ഉച്ചകോടി; 16.56 ലക്ഷം രൂപയുടെ കണക്കെവിടെ?

രാജ്യാന്തര കായിക ഉച്ചകോടിക്കായി 3.62 കോടി രൂപ ചെലവഴിച്ചെന്നും, സ്പോൺസർഷിപ്പ് ഉൾപ്പെടെയുള്ള ഇനങ്ങളിൽ 23.52 ലക്ഷം രൂപ വരുമാനം ലഭിച്ചെന്നും റിപ്പോർട്ട്. എന്നാൽ 6.96 ലക്ഷം രൂപ മാത്രമാണ് തിരിച്ചടച്ചതെന്ന കണക്കാണ് ഇപ്പോൾ ചോദ്യങ്ങൾ ഉയർത്തുന്നത്. ബാക്കി 16.56 ലക്ഷം രൂപയുടെ കണക്കാണ് പ്രധാന ചർച്ച.

3 കോടി 62 ലക്ഷം രൂപ ചെലവഴിച്ച കായിക ഉച്ചകോടി… 5,025 കോടിയുടെ നിക്ഷേപ വാഗ്ദാനം… 10,000 തൊഴിലവസരങ്ങളുടെ പ്രഖ്യാപനം… പക്ഷേ രണ്ടര വർഷത്തിന് ശേഷം ചോദ്യം ചെയ്യപ്പെടുന്നത് 16.56 ലക്ഷം രൂപയുടെ കണക്കും

2024 ജനുവരിയിൽ, എൽഡിഎഫ് സർക്കാരിന്റെ കാലത്താണ് തിരുവനന്തപുരത്ത് International Sports Summit Kerala നടന്നത്. കേരളത്തെ ഒരു വലിയ സ്പോർട്സ് ഹബ്ബാക്കി മാറ്റുക, സ്വകാര്യ നിക്ഷേപം എത്തിക്കുക, സ്പോർട്സ് ഇൻഫ്രാസ്ട്രക്ചർ വികസിപ്പിക്കുക, തൊഴിലവസരങ്ങൾ സൃഷ്ടിക്കുക എന്നീ വലിയ ലക്ഷ്യങ്ങളോടെയാണ് നാല് ദിവസത്തെ സമ്മിറ്റ് സംഘടിപ്പിച്ചത്. ഇതിനായി സർക്കാർ ഖജനാവിൽ നിന്ന് ചെലവായത് ഏകദേശം 3 കോടി 62 ലക്ഷം രൂപയും.

അന്ന് സർക്കാർ മുന്നോട്ടുവെച്ച അവകാശവാദവും ചെറുതായിരുന്നില്ല. 5,025 കോടിയുടെ നിക്ഷേപ വാഗ്ദാനങ്ങൾ ലഭിച്ചു. 10,000 തൊഴിലവസരങ്ങൾ സൃഷ്ടിക്കും. പക്ഷേ രണ്ടര വർഷം കഴിഞ്ഞ് തിരിഞ്ഞുനോക്കുമ്പോൾ ചോദ്യം ഇതാണ്.

അന്ന് പ്രഖ്യാപിച്ച ആ കോടികൾ എവിടെ?
പദ്ധതികൾ എത്രത്തോളം നടപ്പായി?
10,000 തൊഴിലവസരങ്ങളിൽ എത്ര എണ്ണം യാഥാർഥ്യമായി?

ഇതിനിടയിലാണ് മറ്റൊരു സാമ്പത്തിക കണക്ക് പുറത്തുവരുന്നത്. സമ്മിറ്റിലൂടെ സ്പോൺസർഷിപ്പ്, സ്റ്റാൾ വാടക തുടങ്ങിയ ഇനങ്ങളിൽ 23.52 ലക്ഷം രൂപ ലഭിച്ചതായി റിപ്പോർട്ടുകളുണ്ട്. അതിൽ 6.96 ലക്ഷം രൂപ മാത്രമാണ് സർക്കാരിലേക്ക് തിരിച്ചടച്ചത്.

അപ്പോൾ ബാക്കി?

16.56 ലക്ഷം രൂപ. ഇതിന്റെ കൃത്യമായ കണക്കാണ് ഇപ്പോൾ ചോദ്യം ചെയ്യപ്പെടുന്നത്. പക്ഷേ ഇവിടെ ഒരു പ്രധാന കാര്യം പറയണം.
ഈ 16.56 ലക്ഷം രൂപയുടെ കണക്ക് ചോദ്യം ചെയ്യപ്പെടുന്നു എന്നതുകൊണ്ട് മാത്രം അഴിമതി നടന്നെന്ന് പറയാനാകില്ല.

പണം തിരിച്ചടച്ചത് എപ്പോഴാണ്?സർക്കാർ നിശ്ചയിച്ചിരുന്ന സമയപരിധിക്കുള്ളിലായിരുന്നോ?തുക തിരിച്ചടച്ചതിന്റെ രേഖകൾ എന്താണ് പറയുന്നത്?

ഇതെല്ലാം അന്വേഷണത്തിലൂടെ വ്യക്തമാകേണ്ടതാണ്. കാരണം, തിരിച്ചടവ് സമയപരിധിക്കുള്ളിലായിരുന്നെങ്കിൽ വിഷയം വൈകി പണം തിരിച്ചടച്ചു എന്നതിൽ മാത്രം ഒതുങ്ങില്ല.

പകരം ചോദ്യം ഇതായിരിക്കും

ആകെ എത്ര രൂപ പിരിച്ചു?
എത്ര രൂപ സർക്കാരിലേക്ക് നൽകി?
ബാക്കി തുകയുടെ കണക്ക് എന്താണ്?
ആ തുക എങ്ങനെ കൈകാര്യം ചെയ്തു?

ഇനി ഏറ്റവും വലിയ ചോദ്യം 5,025 കോടിയുടെ നിക്ഷേപ വാഗ്ദാനം. സമ്മിറ്റിൽ പങ്കെടുത്ത ചില സ്ഥാപനങ്ങളും വ്യക്തികളും പിന്നീട് സർക്കാർ രേഖകളിൽ കാണുന്ന നിക്ഷേപ കണക്കുകളെ തന്നെ ചോദ്യം ചെയ്തതായി റിപ്പോർട്ടുകളുണ്ട്. ചില പദ്ധതികൾക്ക് നിക്ഷേപ വാഗ്ദാനം ലഭിച്ചതായി സർക്കാർ രേഖപ്പെടുത്തിയെങ്കിലും, ബന്ധപ്പെട്ടവർ അത്തരമൊരു നിക്ഷേപ പ്രതിബദ്ധത നൽകിയിട്ടില്ലെന്നാണ് പറയുന്നത്. അതുകൊണ്ടുതന്നെ ഇപ്പോഴത്തെ അന്വേഷണം 16.56 ലക്ഷം രൂപയിൽ മാത്രം ഒതുങ്ങേണ്ടതല്ല.

3.62 കോടി എങ്ങനെ ചെലവഴിച്ചു?
5,025 കോടിയുടെ നിക്ഷേപ കണക്ക് എങ്ങനെയാണ് തയ്യാറാക്കിയത്?
പ്രഖ്യാപിച്ച പദ്ധതികളിൽ എത്ര എണ്ണം യാഥാർഥ്യമായി?
10,000 തൊഴിലവസരങ്ങളുടെ പ്രഖ്യാപനം എന്തായി?

ഇതെല്ലാം പരിശോധിക്കേണ്ടതുണ്ട്. കാരണം ഇത് ഒരു സ്വകാര്യ പരിപാടിയല്ല. പൊതുപണം ഉപയോഗിച്ച് മുൻ എൽഡിഎഫ് സർക്കാർ സംഘടിപ്പിച്ച ഒരു വലിയ സർക്കാർ പരിപാടിയാണ്. അതുകൊണ്ട് തന്നെ അന്ന് എടുത്ത തീരുമാനങ്ങളും ചെലവുകളും നിക്ഷേപ പ്രഖ്യാപനങ്ങളും ഇപ്പോൾ പരിശോധിക്കപ്പെടുകയാണ്.

അതേസമയം, ഇപ്പോഴത്തെ സർക്കാർ സാമ്പത്തിക ക്രമക്കേടുകളും നടപടിക്രമങ്ങളിലെ വീഴ്ചകളും പരിശോധിക്കാൻ അന്വേഷണത്തിലേക്ക് പോകുകയാണ്. അന്വേഷണത്തിൽ മുൻ സർക്കാരിന്റെ കാലത്ത് സമ്മിറ്റമായി ബന്ധപ്പെട്ട് എടുത്ത തീരുമാനങ്ങളും പരിശോധിക്കുമെന്ന് നിലവിലെ കായികമന്ത്രി വ്യക്തമാക്കിയിട്ടുണ്ട്. പരിപാടി നടന്നത് മുൻ എൽഡിഎഫ് സർക്കാരിന്റെ കാലത്ത്. ചോദ്യങ്ങൾ ഉയർന്നത് പിന്നീട്.
ഇപ്പോൾ കണക്കുകൾ പരിശോധിക്കേണ്ടത് നിലവിലെ സർക്കാരിന്റെ മുന്നിൽ.

ഇനി പുറത്തുവരേണ്ടത് രാഷ്ട്രീയ ആരോപണങ്ങളല്ല. കാരണം ഒരു സർക്കാർ ഉച്ചകോടിയുടെ വിജയം വേദിയിൽ പ്രഖ്യാപിച്ച കോടികളുടെ കണക്കിലല്ല. ആ പ്രഖ്യാപനങ്ങളിൽ എത്ര കോടി യാഥാർഥ്യമായി എന്നതിലാണ്. അതാണ് ഇനി അന്വേഷണത്തിലൂടെ വ്യക്തമാകേണ്ടത്.