ചെലവ് ചുരുക്കല്‍ നിര്‍ദേശങ്ങള്‍ അപര്യാപ്തം. മിനിമം ചാര്‍ജ് 15 രൂപയാക്കണമെന്ന് ആവശ്യപ്പെട്ട് സ്വകാര്യ ബസ് ഉടമകള്‍ സമരത്തിലേക്ക്

സംസ്ഥാനത്ത് കെഎസ്ആര്‍ടിസി വഴി നടപ്പിലാക്കിയ ‘പ്രിയദര്‍ശിനി’ സൗജന്യ യാത്രാ പദ്ധതി സ്വകാര്യ ബസ് മേഖലയ്ക്ക് വലിയ സാമ്പത്തിക തിരിച്ചടിയാണ് ഉണ്ടാക്കിയിരിക്കുന്നത്. ഈ പ്രതിസന്ധി പഠിക്കാന്‍ മുന്‍ ഡിജിപി കെ. പത്മകുമാര്‍ അധ്യക്ഷനായ വിദഗ്ധ സമിതി സര്‍ക്കാരിന് റിപ്പോര്‍ട്ട് സമര്‍പ്പിച്ചിരുന്നു. എന്നാല്‍ സമിതിയുടെ ശുപാര്‍ശകള്‍ യാതൊരുവിധ ആശ്വാസവും നല്‍കുന്നില്ലെന്നും മേഖലയെ സംരക്ഷിക്കാന്‍ പര്യാപ്തമല്ലെന്നും വ്യക്തമാക്കി സ്വകാര്യ ബസ് ഉടമകള്‍ സമര പ്രഖ്യാപനത്തിനൊരുങ്ങുകയാണ്.

യാത്രാനിരക്ക് അടിയന്തരമായി വര്‍ദ്ധിപ്പിക്കണമെന്നും മിനിമം ചാര്‍ജ് 15 രൂപയാക്കണമെന്നുമാണ് ബസ് ഉടമകളുടെ പ്രധാന ആവശ്യം. പ്രിയദര്‍ശിനി പദ്ധതിയുടെ പശ്ചാത്തലത്തില്‍ കെഎസ്ആര്‍ടിസി ഷെഡ്യൂളുകള്‍ പുനഃക്രമീകരിക്കുക, സ്വകാര്യ ബസുകള്‍ പാട്ടത്തിനെടുത്ത് (Wet-lease) സര്‍വീസ് നടത്തുക തുടങ്ങിയവയാണ് സമിതി റിപ്പോര്‍ട്ടിലുള്ളത്. സമിതിയുടെ നിര്‍ദേശങ്ങള്‍ കൊണ്ട് നിലവിലെ പ്രതിസന്ധി പരിഹരിക്കാനാകില്ലെന്ന് ബസുടമകള്‍ പറയുന്നു.

കെഎസ്ആര്‍ടിസിക്ക് നല്‍കുന്നത് പോലെ സൗജന്യ യാത്രാ പദ്ധതിയുടെ നഷ്ടം നികത്താന്‍ തങ്ങള്‍ക്കും സര്‍ക്കാര്‍ സാമ്പത്തിക സഹായം അനുവദിക്കുകയോ ഡീസല്‍ സബ്സിഡി ലഭ്യമാക്കുകയോ വേണമെന്നാണ് ഇവരുടെ വാദം. കാലാനുസൃതമായി വിദ്യാര്‍ത്ഥികളുടെ കണ്‍സെഷന്‍ നിരക്ക് വര്‍ദ്ധിപ്പിക്കണമെന്ന ആവശ്യവും ശക്തമാണ്. സമരത്തിന്റെ ഔദ്യോഗിക പ്രഖ്യാപനവും തുടര്‍നടപടികളും സംബന്ധിച്ച അന്തിമ തീരുമാനം മറ്റന്നാള്‍ ചേരുന്ന യോഗത്തില്‍ ഉണ്ടാകും.