മഹാരാജനായി പ്രാർത്ഥനയോടെ നാട് ; നിർമാണത്തൊഴിലാളി 90 അടി താഴ്ചയുള്ള കിണറിൽ അകപ്പെട്ടിട്ട് 30 മണിക്കൂറുകൾ പിന്നിട്ടു ; രക്ഷാപ്രവർത്തനം തുടരുന്നു

വിഴിഞ്ഞം : വിഴിഞ്ഞത്ത് മണ്ണിടിഞ്ഞ് 90 അടി താഴ്ചയുള്ള കിണറിൽ അകപ്പെട്ട നിർമാണത്തൊഴിലാളിയെ പുറത്തെത്തിക്കാനുള്ള ദൗത്യം തുടരുന്നു. ഇന്നലെ രാവിലെ 10 മണിയോടെ തുടങ്ങിയ രക്ഷാപ്രവർത്തനമാണ് ഇപ്പോഴും നടക്കുകയാണ്. അതെ സമയം തൊഴിലാളി മണ്ണിനടിയിൽ പെട്ടിട്ട് 30 മണിക്കൂർ പിന്നിടുകയാണ്.

വെങ്ങാനൂർ നീലകേശി റോഡ് നെല്ലിത്തറ വീട്ടിൽ മഹാരാജൻ(55) ആണ് പണിക്കിടെ മണ്ണിടിഞ്ഞ് കിണറിനുള്ളിൽ അകപ്പെട്ടത്. വിഴിഞ്ഞം മുക്കോല ശക്തിപുരം റോഡിൽ സ്വകാര്യ വ്യക്തിയുടെ വീട്ടുവളപ്പിലെ കിണർ വൃത്തിയാക്കുന്നതിനിടെയാണ് അപകടമുണ്ടായത്. കിണറിനുള്ളിൽ നേരത്തെ വീണ മണ്ണ് മാറ്റുന്നതിനും പമ്പുസെറ്റ് ഉൾപ്പെട്ട മോട്ടോർ മുകളിലേക്കു മാറ്റുന്നതിനുമാണ് മഹാരാജനും മുക്കോല സ്വദേശികളായ ശേഖർ, കണ്ണൻ, മോഹൻ, പുന്നക്കുളം സ്വദേശി മണികണ്ഠൻ എന്നീ തൊഴിലാളികളുമെത്തിയത്. കിണറിനുള്ളിലുണ്ടായിരുന്ന പമ്പ്സെറ്റും അനുബന്ധ ഉപകരണങ്ങളും കയർകെട്ടി മുകളിലേക്ക് ഉയർത്താൻ ശ്രമിക്കവേയാണ് മണ്ണിടിച്ചിലുണ്ടാകുന്നതും കിണറ്റിലിറങ്ങിയ മഹാരാജൻ അകപ്പെടുന്നതും. മുകളിലേക്കു കയറാൻ ശ്രമിക്കുന്നതിനിടയിൽ പുതുതായി അടുക്കിയ ഉറകൾക്കു താഴെയുള്ള പഴയ ഉറകൾ മണ്ണിടിച്ചിലിനെത്തുടർന്ന് ഇളകി മഹാരാജന്റെ ദേഹത്ത് വീണു. 16 റിങ്ങുകളുടെ അവശിഷ്ടങ്ങൾ സന്ധ്യയോടെ നീക്കി. ബാക്കിയുള്ള മണ്ണ് നീക്കംചെയ്യാനുള്ള ശ്രമം തുടരുകയാണ്.

തൊഴിലാളികളും അഗ്നിരക്ഷാസേനാംഗങ്ങൾക്കൊപ്പം രക്ഷാപ്രവർത്തനത്തിൽ പങ്കെടുക്കുകയാണ് . ഇവർക്ക് ശ്വാസിക്കുന്നതിനുള്ള ശുദ്ധവായു ലഭ്യമാക്കുന്ന ബ്രീത്തിങ് അപ്പാരറ്റസ്‌, ഓക്‌സിജൻ സിലിൻഡർ, ആംബുലൻസ് അടക്കമുള്ള രക്ഷാസന്നാഹങ്ങളൊരുക്കിയാണ് രക്ഷാപ്രവർത്തനം നടത്തുന്നത്.