സ്വകാര്യ ബസിൽ നിന്നും തെറിച്ചുവീണ് എട്ടാം ക്ലാസുകാരന് ഗുരുതര പരിക്ക്;ബസ് തടഞ്ഞ് നിർത്തി നാട്ടുകാർ

കോട്ടയം:സ്വകാര്യ ബസിൽ നിന്നും തെറിച്ചുവീണ് എട്ടാം ക്ലാസുകാരന് ഗുരുതര പരിക്ക്.കോട്ടയം ചിങ്ങവനത്തിനടുത്ത് പവർഹൗസ് ജംഗ്ഷനിൽ വെള്ളിയാഴ്ച വൈകിട്ട് നാല് മണിയോടെയാണ് അപകടം നടന്നത്.എട്ടാം ക്ലാസുകാരനായ അഭിറാമിന് മുഖത്തും കൈമുട്ടിനും പരിക്കേറ്റു.വിദ്യാർത്ഥി വീണിട്ടും ബസ് നിർത്താത്തതിനെ തുടർന്ന് നാട്ടുകാർ തടഞ്ഞു നിർത്തുകയായിരുന്നു.

കോട്ടയം-കൈനടി റൂട്ടിലോടുന്ന ചിപ്പി എന്ന് പേരുള്ള ബസാണ് അപകടമുണ്ടാക്കിയത്.
ബസ് അമിതവേഗത്തിലായിരുന്നു സഞ്ചരിച്ചിരുന്നതെന്ന് തെളിയിക്കുന്ന സിസിടിവി ദൃശ്യങ്ങൾ പുറത്ത് വന്നിട്ടുണ്ട്.വിദ്യാർത്ഥി ബസിൽ നിന്നും വീണിട്ടും
ബസ് ജീവനക്കാർ വേണ്ട നടപടികൾ എടുക്കാൻ തയ്യാറായില്ല.സംഭവം വിവാദമായതോടെ ഡ്രൈവറോട് തിങ്കളാഴ്ച ഹാജരാകാൻ ആർടിഒ നിർദേശിച്ചിട്ടുണ്ട്.