ഓട്ടോറിക്ഷ കെട്ടിവലിച്ചുകൊണ്ട് പോയ കയറില്‍ തട്ടി വീണു !ആലുവയിൽ പത്തൊമ്പതുകാരനായ ബൈക്ക് യാത്രികന് ദാരുണാന്ത്യം

ആലുവ അമ്പാട്ടുകാവില്‍ ഓട്ടോറിക്ഷ കെട്ടിവലിച്ചുകൊണ്ട് പോയ കയറില്‍ തട്ടി വീണ് ബൈക്ക് യാത്രികനായ യുവാവിന് ദാരുണാന്ത്യം. കുന്നത്തുകരയില്‍ എളമന തൂമ്പളായില്‍ ഫഹദ് എന്ന പത്തൊമ്പതുകാരനാണ് അപകടത്തിൽ മരിച്ചത്. ഇന്ന് രാവിലെയാണ് അപകടം നടന്നത്.

ബ്രേക്ക് ഡൗണായ ഓട്ടോറിക്ഷ മറ്റൊരു ഓട്ടോറിക്ഷയിൽ കയറുപയോഗിച്ച് കെട്ടി വലിച്ചുകൊണ്ട് പോകുകയായിരുന്നു. വളരെ തിരക്കേറിയ റോഡിലൂടെയാണ് അപകടകരമായ വിധത്തില്‍ ഓട്ടോറിക്ഷ കെട്ടിവലിച്ചുകൊണ്ടുവന്നിരുന്നത്. കെട്ടിവലിച്ചുകൊണ്ടുവരുന്നതിന്റെ സൂചനകളൊന്നും ഓട്ടോ നല്‍കിയിരുന്നില്ല. കൂടാതെ ഇരു ഓട്ടോകള്‍ക്കിടയിലും കയര്‍ കെട്ടിയിട്ടുള്ള കാര്യം പെട്ടെന്ന് ശ്രദ്ധിക്കാൻ സഹായിക്കുന്ന സൂചനകളും ഇല്ലായിരുന്നു.ഓട്ടോകൾ യു ടേണ്‍ എടുക്കുന്നതിനിടയില്‍ ഓട്ടോകള്‍ക്കുമിടയില്‍ കുറച്ച് സ്ഥലമുണ്ടായിരുന്നു. ഇതിനിടയിലെ കയർ ശ്രദ്ധിക്കാതെ എത്തിയ ബൈക്ക് യാത്രികൻ കയറില്‍ കുരുങ്ങി വീഴുകയായിരുന്നു.