കോട്ടയം വൈക്കത്ത് ഇരുപതോളം പേരുമായി പോകുകയായിരുന്ന വള്ളം മറിഞ്ഞു !ഒരാളെ കാണാനില്ല; തെരച്ചിലിന് നേവിയുടെ സഹായം തേടും

കോട്ടയം: കോട്ടയം വൈക്കത്തിനടുത്ത് കാട്ടിക്കുന്നിൽ വള്ളം മറിഞ്ഞ് ഒരാളെ കാണാനില്ല. പാണാവള്ളി സ്വദേശി കണ്ണന്‍ എന്ന സുമേഷിനെയാണ് കാണാതായത് .ചെമ്പിനടുത്ത് തുരുത്തേൽ എന്ന സ്ഥലത്ത് മരണാനന്തര ചടങ്ങിൽ പങ്കെടുത്ത് മടങ്ങുകയായിരുന്ന സംഘമാണ് അപകടത്തിൽ പെട്ടത്. 23 പേരാണ് വള്ളത്തിൽ ഉണ്ടായിരുന്നത്. ഇവര്‍ അരൂർ പാണാവള്ളി സ്വദേശികൾ ആണ് .

വള്ളത്തിലുണ്ടായിരുന്ന മറ്റുള്ളവരെ രക്ഷപ്പെടുത്തി. ഇതില്‍ പരിക്കേറ്റ മൂന്നുപേരെ ആശുപത്രിയിലേക്ക് മാറ്റി.
കരയ്ക്ക് നിന്ന് അധികം ദൂരെയായിട്ടല്ല വള്ളം മറിഞ്ഞിരിക്കുന്നത്. വള്ളം മറിഞ്ഞപ്പോള്‍ സുമേഷ് അഞ്ച് പേരെ രക്ഷപ്പെടുത്തി. പിന്നീട് കുഴഞ്ഞുപോവുകയും ഒഴുക്കിൽ പെടുകയുമായിരുന്നു. ഫയര്‍ഫോഴ്സിന്‍റെയും പോലീസിന്‍റെയും നേതൃത്വത്തിലാണ് രക്ഷാപ്രവര്‍ത്തനം പുരോഗമിക്കുന്നത്. തെരച്ചിലിന് നേവിയുടെ സഹായം തേടുമെന്നാണ് വിവരം