സെല്ലിലെ ഫാൻ പ്രവർത്തിക്കുന്നതുമായി ബന്ധപ്പെട്ട തർക്കം; വിയ്യൂർ ജയിലിൽ, ആകാശ് തില്ലങ്കേരി അസി. ജയിലറിന്റെ മൂക്ക് ഇടിച്ചു തകർത്തെന്ന് പരാതി

കാപ്പ ചുമത്തപ്പെട്ട് നിലവിൽ വിയ്യൂർ ജയിലിൽ കഴിയുന്ന ആകാശ് തില്ലങ്കേരിക്കെതിരെ അസി. ജയിലറിന്റെ മൂക്ക് ഇടിച്ചു തകർത്തെന്ന് പരാതി. സ്വർണ്ണക്കടത്ത് ഉൾപ്പെടെയുള്ള കേസുകളിൽ വിയൂർ ജയിലിൽ കഴിയുകയായിരുന്ന ആകാശും സുഹൃത്തും കൂടി ചേർന്നാണ് വിയ്യൂർ ജയിലിലെ അസി. ജയിലർ രാഹുലിന്റെ മൂക്ക് ഇടിച്ച് തകർത്തത്. സംഭവത്തിൽ വിയ്യൂർ പൊലീസ് കേസെടുത്തു. അസി. ജയിലറെ തൃശൂർ മെഡിക്കൽ കോളേജിൽ പ്രവേശിപ്പിച്ചിരിക്കുകയാണ്.

സെല്ലിലെ ഫാൻ പ്രവർത്തിക്കുന്നതുമായി ബന്ധപ്പെട്ട തർക്കത്തിനിടെ പ്രകോപിതനായ ആകാശ് തില്ലങ്കേരി അസി. ജയിലറെ ആക്രമിക്കുകയായിരുന്നുവെന്നാണ് ലഭിക്കുന്ന വിവരം. ജയിലിൽ നിന്നും ഇന്റിമേഷൻ റിപ്പോർട്ട് കിട്ടുന്ന മുറയ്ക്ക് പൊലീസ് അന്വേഷണം ആരംഭിക്കും. യൂത്ത് കോൺഗ്രസ് പ്രവർത്തകൻ ഷുഹൈബിനെ വെട്ടിക്കൊലപ്പെടുത്തിയ കേസിലും സ്വർണക്കടത്ത് ഉൾപ്പെടെ നിരവധി കേസുകളിലും മുഖ്യപ്രതിയാണ് ആകാശ് തില്ലങ്കേരി