പെട്രോൾ അടിച്ച് പണം നൽകാതെ മുങ്ങി; കാർ എത്തിയത് വ്യാജ നമ്പറിൽ, ഉടമയെ വിളിച്ചപ്പോൾ പുറത്തുവന്നത് ഞെട്ടിക്കുന്ന വിവരം

കോഴിക്കോട്: എടവണ്ണപ്പാറയിലെ പെട്രോൾ പമ്പിൽ നിന്ന് ഇന്ധനം നിറച്ച ശേഷം പണം നൽകാതെ കാർ ഓടിച്ചു പോയതായി പരാതി. എടവണ്ണപ്പാറ പാഞ്ചീരിയിലെ ‘പറയങ്ങാട്ട് ഫ്യുവൽസ്’ (ഹിന്ദുസ്ഥാൻ പെട്രോളിയം) പമ്പിലാണ് പുലർച്ചെ തട്ടിപ്പ് നടന്നത്. വെളുത്ത ഫോക്‌സ്‌വാഗൺ കാറിലെത്തിയ സംഘമാണ് ജീവനക്കാരെ കബളിപ്പിച്ചത്.

പമ്പിലെത്തിയ കാറുകാരൻ 1500 രൂപയ്ക്ക് പെട്രോൾ അടിച്ചു. പണം ആവശ്യപ്പെട്ടപ്പോൾ പമ്പ് ജീവനക്കാരന് എടിഎം കാർഡ് നൽകി. കാർഡ് സ്വൈപ്പ് ചെയ്യാനായി ജീവനക്കാരൻ മെഷീന് അടുത്തേക്ക് തിരിഞ്ഞ നിമിഷം കാർ അതിവേഗത്തിൽ ഓടിച്ചുപോവുകയായിരുന്നു. അപ്രതീക്ഷിത നീക്കത്തിൽ ജീവനക്കാർ പകച്ചുപോയി.

തുടർന്ന് പമ്പ് ഉടമ സിസിടിവി ദൃശ്യങ്ങൾ പരിശോധിച്ച് കാറിന്റെ നമ്പർ ശേഖരിക്കുകയും മോട്ടോർ വാഹന വകുപ്പിന്റെ സൈറ്റ് വഴി ഉടമയുടെ ഫോൺ നമ്പർ കണ്ടെത്തി ബന്ധപ്പെടുകയും ചെയ്തു. എന്നാൽ, പാലക്കാട് ജില്ലയിൽ ടാക്സിയായി ഓടുന്ന മറ്റൊരു കാറിന്റെ നമ്പറാണ് തട്ടിപ്പിന് ഉപയോഗിച്ചതെന്ന് അപ്പോഴാണ് വ്യക്തമായത്. യഥാർത്ഥ കാർ ഉടമ തന്റെ വാഹനത്തിന്റെ ചിത്രങ്ങൾ പമ്പ് ഉടമയ്ക്ക് അയച്ചുനൽകിയതോടെയാണ് വലിയൊരു വ്യാജ നമ്പർ തട്ടിപ്പാണ് നടന്നതെന്ന് ബോധ്യപ്പെട്ടത്.

സംഭവത്തിൽ സിസിടിവി ദൃശ്യങ്ങൾ സഹിതം പമ്പ് ഉടമ പോലീസിൽ പരാതി നൽകി. വ്യാജ നമ്പർ ഉപയോഗിച്ച് സമാനമായ രീതിയിൽ ഇവർ മറ്റു സ്ഥലങ്ങളിലും തട്ടിപ്പ് നടത്തിയിട്ടുണ്ടോ എന്ന് പോലീസ് അന്വേഷിച്ചു വരികയാണ്.