പ്രത്യാശയുടെയും പുനരുജ്ജീവനത്തിന്റെയും സന്ദേശം …ഈസ്റ്റർ ദിനത്തിൽ ആശംസകൾ നേർന്ന് പ്രധാനമന്ത്രി നരേന്ദ്രമോദി

ദില്ലി : ലോകമെമ്പാടുമുള്ള ക്രൈസ്തവ വിശ്വാസികൾ ഈസ്റ്റർ ആഘോഷിക്കുന്ന വേളയിൽ ആശംസകളുമായി പ്രധാനമന്ത്രി നരേന്ദ്രമോദി. പ്രത്യാശയുടെയും പുനരുജ്ജീവനത്തിന്റെയും തിരുനാളായ ഈസ്റ്റർ ഏവർക്കും സമാധാനവും സന്തോഷവും ഉന്മേഷവും പകരട്ടെ എന്ന് അദ്ദേഹം ആശംസിച്ചു. യേശുക്രിസ്തുവിന്റെ മഹത്തായ വചനങ്ങൾ സമൂഹത്തിൽ ദയയും സഹാനുഭൂതിയും വളർത്താൻ ഏവരെയും പ്രചോദിപ്പിക്കട്ടെയെന്നും അദ്ദേഹം തന്റെ സന്ദേശത്തിൽ കുറിച്ചു.

സമൂഹത്തിൽ ഐക്യത്തിന്റെയും ഒരുമയുടെയും വികാരം ശക്തിപ്പെടുത്താൻ ഈ വിശേഷാൽ ദിനത്തിന് സാധിക്കുമെന്നും മാനവികതയുടെയും സാഹോദര്യത്തിന്റെയും മൂല്യങ്ങൾ ഉയർത്തിപ്പിടിക്കുന്ന ക്രിസ്തുവിന്റെ അധ്യാപനങ്ങൾ വർത്തമാനകാലത്ത് ഏറെ പ്രസക്തമാണെന്നും അദ്ദേഹം കൂട്ടിച്ചേർത്തു. ഗവർണർമാരും മുഖ്യമന്ത്രിമാരും ഉൾപ്പെടെയുള്ള പ്രമുഖരും ക്രൈസ്തവ സമൂഹത്തിന് ഈസ്റ്റർ മംഗളങ്ങൾ നേർന്നു.