ഷിരൂർ രക്ഷാദൗത്യത്തിൽ പ്രതീക്ഷയുടെ തിരിനാളം ! അർജുന്റെ ലോറിയുടെ ജാക്കി കണ്ടെത്തി

കർണാടകയിലെ ഷിരൂരിലുണ്ടായ മണ്ണിടിച്ചിലിൽ കാണാതായ മലയാളി ഡ്രൈവർ അര്‍ജുന്റെ ട്രക്കിന്റേതെന്ന് സംശയിക്കുന്ന ജാക്കി കണ്ടെത്തി. ഗംഗാവലി പുഴയ്ക്ക് സമീപം കരയോട് ചേര്‍ന്നുള്ള ഭാഗത്ത് പ്രാദേശിക നീന്തൽ വിദഗ്ധനും മത്സ്യത്തൊഴിലാളിയുമായ ഈശ്വർ മാൽപ്പെ നടത്തിയ തെരച്ചിലിലാണ് ചുവന്ന നിറത്തിലുള്ള ഹൈഡ്രോളിക് ജാക്കി കണ്ടെത്തിയത്.

ജാക്കി തന്റെ ട്രക്കിന്റേതെന്ന് തന്നെയെന്ന് ഉടമ മനാഫ് പറഞ്ഞു. ലോറിയുടെ പിന്‍ഭാഗത്ത് ടൂള്‍സ് ബോക്സിലാണ് ജാക്കി സൂക്ഷിച്ചിരുന്നതെന്നും പുതിയ ജാക്കി തന്നെയാണ് കണ്ടെത്തിയതെന്നും അര്‍ജുൻ ഓടിച്ചിരുന്ന ഭാരത് ബെന്‍സ് ലോറിയിലുണ്ടായിരുന്നതാണ് ഇതേ ജാക്കിയാണെന്ന കാര്യത്തിൽ യാതൊരു സംശയവും ഇല്ലെന്നും മനാഫ് പറഞ്ഞു.

അതേസമയം അർജുനായുള്ള ഇന്നത്തെ തെരച്ചിൽ അവസാനിപ്പിച്ചു. നാളെ നേവിയുടെ മുങ്ങൽ വിദഗ്ധരും സ്ഥലത്തെത്തും. നാളെ രാവിലെ എട്ട് മണിയോടെ ദൗത്യം പുനരാരംഭിക്കുമെന്ന് ഈശ്വർ മാൽപ്പെ പറഞ്ഞു.