കൗതുകം ലേശം കൂടുതലാ.. മഞ്ചേശ്വരത്ത് സ്വകാര്യ വ്യക്തിയുടെ പുരയിടത്തിൽ തിമിംഗലത്തിന്റെ അസ്ഥികൂടം സൂക്ഷിച്ച നിലയിൽ

മഞ്ചേശ്വരം : സ്വകാര്യ വ്യക്തിയുടെ ഉടസ്ഥതയിലുള്ള പുരയിടത്തിൽ സൂക്ഷിച്ച നിലയിൽ തിമിംഗലത്തിന്റെ അസ്ഥികൂടം കണ്ടെത്തി. കണ്വതീർഥ ബീച്ചിനു സമീപത്തെ സ്വകാര്യ വ്യക്തിയുടെ സ്ഥലത്താണ് ഷെഡ് കെട്ടി സംരക്ഷിച്ച നിലയിൽ തിമിംഗല അസ്ഥികൂടം കണ്ടെത്തിയത്. അസ്ഥികളുടെ 23 ഭാഗങ്ങൾ കണ്ടെത്തി. കസ്റ്റഡിയിലെടുത്ത അസ്ഥികൂടം തൽക്കാലം ഇതേ സ്ഥലത്ത് സൂക്ഷിക്കും. ഡിഎൻഎ പരിശോധന നടത്തിയതിന് ശേഷമാകും തുടർ നടപടികൾ സ്വീകരിക്കുക. നിലവിൽ ഈ സ്ഥലത്ത് തൊഴിലാളികൾ മാത്രമാണ് താമസിക്കുന്നത്. സ്ഥലമുടമ കർണാടകയിലാണ് താമസം.

2007ൽ മഞ്ചേശ്വരത്തിനു സമീപത്ത് തീരത്തടിഞ്ഞ തിമിംഗലത്തിന്റെ അസ്ഥികൂടം പറമ്പിലെത്തിച്ച് ഷെഡ് നിർമിച്ച് അതിൽ സൂക്ഷിക്കുകയായിരുന്നു. വന്യജീവി സംരക്ഷണ നിയമ പ്രകാരം തിമിംഗലത്തിന്റെ അസ്ഥികൾ സൂക്ഷിക്കുന്നത് കുറ്റകരമാണ്. കൗതുകത്തിന്റെ പേരിലാണ് സ്വകാര്യവ്യക്തി അസ്ഥികൾ ഇത്രയും കാലം സൂക്ഷിച്ചതെന്നാണ് കരുതുന്നത്.