വേൾഡ് വൈഡ് ഹിറ്റ്! 300 കോടി കടന്ന് വിജയ്‌യുടെ ‘ജന നായകൻ’; കേരളത്തിലും റെക്കോർഡ് നേട്ടം

ചെന്നൈ: തമിഴ് സൂപ്പർതാരം വിജയ്‌യുടെ അവസാന ചിത്രമെന്ന വിശേഷണത്തോടെ എത്തിയ ‘ജന നായകൻ’ ബോക്സ് ഓഫീസിൽ കുതിപ്പ് തുടരുകയാണ്. റിലീസ് ചെയ്ത് 12 ദിവസങ്ങൾ പിന്നിടുമ്പോൾ ചിത്രം ആഗോളതലത്തിൽ 300 കോടി രൂപയുടെ ഗ്രോസ് കളക്ഷൻ പിന്നിട്ടെന്നാണ് റിപ്പോർട്ടുകൾ.

ബോക്സ് ഓഫീസ് ട്രാക്കറായ സാക്നിൽക്കിന്റെ കണക്കുകൾ പ്രകാരം, ഇന്ത്യയിൽ നിന്ന് ചിത്രം ഇതുവരെ 209.35 കോടി രൂപയുടെ ഗ്രോസ് കളക്ഷനും 179.45 കോടി രൂപയുടെ നെറ്റ് കളക്ഷനും സ്വന്തമാക്കി. വിദേശ വിപണികളിൽ നിന്ന് 92 കോടി രൂപ നേടിയതോടെ ചിത്രത്തിന്റെ ആകെ ആഗോള ഗ്രോസ് 301.35 കോടി രൂപയായി.

കേരളത്തിലും ചിത്രം മികച്ച പ്രകടനമാണ് കാഴ്ചവെക്കുന്നത്. 2026-ൽ കേരളത്തിൽ ഏറ്റവും കൂടുതൽ ഗ്രോസ് കളക്ഷൻ നേടിയ തമിഴ് ചിത്രമെന്ന നേട്ടം ‘ജന നായകൻ’ സ്വന്തമാക്കി. ഈ വർഷം പുറത്തിറങ്ങിയ തമിഴ് ചിത്രങ്ങളായ ‘ബ്ലാസ്റ്റ്’, ‘കറുപ്പ്’ എന്നിവയുടെ കേരള കളക്ഷൻ റെക്കോർഡുകളാണ് ചിത്രം മറികടന്നത്.

വിജയ്‌യുടെ സിനിമാ ജീവിതത്തിലെ അവസാന ചിത്രമെന്ന പ്രത്യേകതയും ‘ജന നായകൻ’ക്ക് വലിയ സ്വീകാര്യത നേടിക്കൊടുക്കുന്നുണ്ട്. റിലീസിന് മാസങ്ങൾ മുമ്പ് സിനിമയുടെ ചില ഭാഗങ്ങൾ ഓൺലൈനിൽ ചോർന്നിരുന്നുവെങ്കിലും അതൊന്നും ചിത്രത്തിന്റെ ബോക്സ് ഓഫീസ് പ്രകടനത്തെ ബാധിച്ചില്ല. പ്രായഭേദമന്യേ ആരാധകർ തിയേറ്ററുകളിലെത്തി ചിത്രം ആഘോഷമാക്കുകയാണ്. പ്രത്യേകിച്ച് ‘തമിഴ്‌നാട് മുഖ്യമന്ത്രി സി. ജോസഫ് വിജയ്’ എന്ന ടൈറ്റിൽ കാർഡ് സ്ക്രീനിൽ പ്രത്യക്ഷപ്പെടുന്ന നിമിഷം തിയേറ്ററുകളിൽ ആവേശകരമായ പ്രതികരണമാണ് ലഭിക്കുന്നത്.

എച്ച്. വിനോദ് സംവിധാനം ചെയ്യുന്ന ചിത്രത്തിൽ ബോബി ഡിയോൾ, പൂജ ഹെഡ്ഗെ, മമിത ബൈജു, പ്രകാശ് രാജ്, ഗൗതം വാസുദേവ് മേനോൻ, നരേൻ, പ്രിയാമണി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. കെവിഎൻ പ്രൊഡക്ഷൻസ് ബാനറിൽ വെങ്കട്ട് കെ. നാരായണ നിർമിച്ചിരിക്കുന്ന ചിത്രത്തിന്റെ ഛായാഗ്രഹണം സത്യൻ സൂര്യൻ നിർവഹിച്ചിരിക്കുന്നു.