എഎപിക്ക് ലഭിച്ചത് 7.08 കോടി രൂപയുടെ വിദേശ ഫണ്ട്! പാർട്ടി ചട്ടലംഘനം നടത്തിയെന്ന് റിപ്പോർട്ട്; വെളിപ്പെടുത്തലുമായി ഇ.ഡി

ദില്ലി ; മദ്യനയ അഴിമതി കേസുമായി ബന്ധപ്പെട്ട വിവാദം തുടരുന്നതിനിടെ ആം ആദ്മി പാർട്ടിക്കെതിരെ പുതിയ ആരോപണവുമായി ഇ.ഡി. 2014-2022 കാലയളവിൽ എഎപിക്ക് 7.08 കോടി രൂപയുടെ വിദേശ ഫണ്ട് ലഭിച്ചതായി ഇഡി കേന്ദ്ര ആഭ്യന്തര മന്ത്രാലയത്തെ അറിയിച്ചു. ഈ വിദേശ ഫണ്ട് സ്വീകരിച്ചതിലൂടെ പാർട്ടി എഫ്‌സിആർഎ, ആർപിഎ, ഐപിസി എന്നിവ ലംഘിച്ചതായി അന്വേഷണ ഏജൻസി ആരോപിച്ചു. ഇതുമായി ബന്ധപ്പെട്ട വിദേശ ദാതാക്കളുടെ ഐഡൻ്റിറ്റിയും പൗരത്വവും മറ്റ് നിരവധി വസ്തുതകളും മറച്ചുവെച്ചെന്നത് ഉൾപ്പെടെയുള്ള ആരോപണങ്ങൾ ഇ.ഡി റിപ്പോർട്ടിൽ ഉന്നയിച്ചിട്ടുണ്ട്. കോടതിയിൽ കേസ് നടക്കുന്നതിനിടെയാണ് ആം ആദ്മി പാർട്ടിയുടെ വിദേശ ഫണ്ട് സംബന്ധിച്ച് ഇഡി ഇപ്പോൾ വൻ വെളിപ്പെടുത്തൽ നടത്തിയിരിക്കുന്നത്.

അമേരിക്ക, കാനഡ, ഓസ്‌ട്രേലിയ, ന്യൂസിലാൻഡ്, സൗദി അറേബ്യ, യുണൈറ്റഡ് അറബ് എമിറേറ്റ്‌സ്, കുവൈറ്റ്, ഒമാൻ തുടങ്ങിയ രാജ്യങ്ങളിൽ നിന്നുള്ള നിരവധി ദാതാക്കളിൽ നിന്ന് ആം ആദ്മി പാർട്ടിക്ക് പണം ലഭിച്ചതായി ഇഡി പറഞ്ഞു. ഒരേ പാസ്‌പോർട്ട് നമ്പർ, ക്രെഡിറ്റ് കാർഡ്, ഇമെയിൽ ഐഡി, മൊബൈൽ നമ്പർ എന്നിവ വിവിധ ദാതാക്കൾ പണം കൈമാറാൻ ഉപയോഗിച്ചു.

എഎപിയും പാർട്ടി നേതാക്കളും ഉൾപ്പെട്ട വിദേശ ഫണ്ട് സ്വരൂപിക്കുന്നതിലെ ക്രമക്കേടുകളുടെ നിരവധി കേസുകൾ ഇഡി അന്വേഷണത്തിൽ പരാമർശിച്ചിട്ടുണ്ട്. ഇതിൽ, 2016ൽ കാനഡയിൽ നടന്ന ധനസമാഹരണ പരിപാടിയിൽ നിന്ന് സ്വരൂപിച്ച പണം പാർട്ടി എം.എൽ.എ ദുർഗേഷ് പഥക് ഉൾപ്പെടെയുള്ള നേതാക്കൾ വ്യക്തിപരമായ നേട്ടങ്ങൾക്കായി ദുരുപയോഗം ചെയ്തതായി ആരോപണമുണ്ട്.അനികേത് സക്‌സേന, കുമാർ വിശ്വാസ്, കപിൽ ഭരദ്വാജ്, ദുർഗേഷ് പഥക് എന്നിവരുൾപ്പെടെ വിവിധ എഎപി വോളൻ്റിയർമാരും ഭാരവാഹികളും തമ്മിൽ കൈമാറിയ ഇ-മെയിലുകളുടെ അടിസ്ഥാനത്തിലാണ് ഏജൻസി ആരോപണങ്ങൾ ഉന്നയിച്ചത്.