തിരുവനന്തപുരം ഹാപ്പിലാൻഡ് അമ്യൂസ്‌മെന്റ് പാർക്കിൽ അപകടം! ജയന്റ് വീൽ തകർന്നുവീണ് കുട്ടികളടക്കം അഞ്ച് പേർക്ക് ഗുരുതര പരിക്ക്

തിരുവനന്തപുരം : തലസ്ഥാനത്തെ പ്രമുഖ വിനോദകേന്ദ്രമായ വെമ്പായത്തെ ‘ഹാപ്പിലാൻഡ്’ അമ്യൂസ്മെൻ്റ് പാർക്കിൽ റൈഡ് തകർന്നുവീണ് അഞ്ച് പേർക്ക് പരിക്ക്. പാർക്കിലെ ജയന്റ് വീൽ കറങ്ങിക്കൊണ്ടിരിക്കുന്നതിനിടെ പെട്ടെന്ന് പൊട്ടി താഴേക്ക് പതിച്ചാണ് വൻ അപകടമുണ്ടായത്. പരിക്കേറ്റവരിൽ രണ്ട് കുട്ടികളും ഉൾപ്പെടുന്നു. അപകടം നടക്കുമ്പോൾ കുട്ടികളടക്കം ഇരുപത്തിയാറോളം പേർ ജയന്റ് വീലിൽ ഉണ്ടായിരുന്നുവെന്നാണ് ലഭിക്കുന്ന വിവരം. ഭാഗികമായി തകർന്ന റൈഡിനുള്ളിൽ കുടുങ്ങിയവരെ ഏറെ പ്രയത്നിച്ചാണ് പുറത്തെടുത്തത്.

അപകടത്തിൽ പരിക്കേറ്റ അഞ്ച് പേരെയും ഉടൻ തന്നെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇവരിൽ ചിലരുടെ ആരോഗ്യനില അതീവ ഗുരുതരമാണെന്നാണ് ആശുപത്രി അധികൃതരിൽ നിന്ന് ലഭിക്കുന്ന സൂചനകൾ. റൈഡ് ഉയർന്നുപൊങ്ങിയ സമയത്ത് അതിന്റെ പ്രധാന ഭാഗത്തെ വെൽഡിങ് പൊട്ടിയതാണ് ജയന്റ് വീൽ തകിടം മറിഞ്ഞ് താഴേക്ക് പതിക്കാൻ ഇടയാക്കിയതെന്നാണ് പ്രാഥമിക നിഗമനം. പാർക്കിലെ സുരക്ഷാ മാനദണ്ഡങ്ങളിൽ വീഴ്ചയുണ്ടായോ എന്നതിനെക്കുറിച്ച് അധികൃതർ അന്വേഷണം ആരംഭിച്ചിട്ടുണ്ട്. അവധിക്കാലം ആഘോഷിക്കാൻ നിരവധി കുടുംബങ്ങൾ എത്തുന്ന പാർക്കിലുണ്ടായ ഈ അപകടം കടുത്ത ആശങ്കയ്ക്ക് കാരണമായിരിക്കുകയാണ്.