മഹാ കുംഭമേളയ്‌ക്കിടെ അനിയന്ത്രിത തിരക്ക് മൂലമുണ്ടായ അപകടം ! സ്ഥിതിഗതികൾ നിയന്ത്രണവിധേയമെന്ന് യോഗി ആദിത്യനാഥ്‌ ;പ്രയാഗ്‌രാജിലുള്ളത് 10 കോടി പേരെന്നും യുപി മുഖ്യമന്ത്രി

പ്രയാഗ്‌രാജ്: മഹാ കുംഭമേളയ്‌ക്കിടെയുണ്ടായ അനിയന്ത്രിത തിരക്ക് നിയന്ത്രണവിധേയമാക്കിയതായി മുഖ്യമന്ത്രി യോ​ഗി ആദിത്യനാഥ്. തിക്കിലും തിരക്കിലും പെട്ട് നിരവധി പേർക്ക് പരിക്കേറ്റെന്ന വാർത്തകൾ പ്രചരിക്കുന്ന സാഹചര്യത്തിലാണ് പ്രതികരണവുമായി യുപി മുഖ്യമന്ത്രി തന്നെ രംഗത്ത് വന്നത്.

പ്രയാഗ്‌രാജിലെ സാഹചര്യം നിയന്ത്രണവിധേയമാണെന്ന് യോ​ഗി വ്യക്തമാക്കി. ബാരിക്കേഡുകൾ മറികടന്ന് ജനം വന്നതാണ് അപകടത്തിന് കാരണമായതെന്നും പരിക്കേറ്റ എല്ലാ തീർത്ഥാടകരെയും ആശുപത്രിയിൽ എത്തിച്ചതായും മുഖ്യമന്ത്രി അറിയിച്ചു. അഭ്യൂഹ​ങ്ങൾക്കും കിംവദന്തികൾക്കും
ചെവി നൽകരുതെന്ന് തീർത്ഥാടകരോട് അഭ്യർത്ഥിക്കുകയാണെന്നും അദ്ദേഹം കൂട്ടിച്ചേർത്തു.

ഇന്നലെ രാത്രി മുതൽ മൗനി അമാവാസി മുഹൂർത്തം ആരംഭിച്ചതിനാൽ ധാരാളം തീർത്ഥാടകർ പുണ്യസ്നാനത്തിനായി എത്തിയിരുന്നു. മഹാകുംഭ മേളയിലെ ഏറ്റവും പ്രധാന ദിവസമാണ് മഹാമൗനി അമാവാസി. മൂന്നു നദികളുടെ സംഗമസ്ഥാനമായി കരുതപ്പെടുന്ന ത്രിവേണീസംഗമത്തിൽ ഈ ദിവസം നടത്തുന്ന അമൃത് സ്നാനം മോക്ഷം നൽകുമെന്നാണ് വിശ്വാസം. അതിനാൽ കോടിക്കണക്കിനു വിശ്വാസികളാണ് അമൃത് സ്നാനത്തിനായി ഇവിടേക്ക് ഒഴുകിയത്. ഇതോടെ പ്രയാഗ്‌രാജിൽ ഒരേസമയം എത്തിയ തീർത്ഥാടകരുടെ എണ്ണം പത്ത് കോടി കവിഞ്ഞു. സം​ഗം മാർ​ഗ്, നാ​ഗ് വാസുകി മാർ​ഗ്, എന്നിവിടങ്ങളിൽ ഇപ്പോഴും വലിയ ജനക്കൂട്ടമാണുള്ളത്.

അഖാര മാർ​ഗിൽ സ്ഥാപിച്ച ബാരിക്കേഡുകൾ മറികടക്കാൻ ജനങ്ങളിൽ ചിലർ ശ്രമിച്ചിരുന്നു. ഇതോടെ തിക്കും തിരക്കുമുണ്ടാവുകയും തീർത്ഥാടകർക്ക് പരിക്കേൽക്കുകയും ചെയ്തു. പരിക്കേറ്റ എല്ലാവർക്കും നിലവിൽ ചികിത്സ ലഭ്യമാക്കി. രാവിലെ മുതൽ നാല് തവണയാണ് പ്രധാനമന്ത്രി നരേന്ദ്രമോദി വിളിച്ച് സംസാരിച്ചത്. കേന്ദ്ര ആഭ്യന്തരമന്ത്രി അമിത് ഷാ, ​ഗവർണർ ആനന്ദിബെൻ പട്ടേൽ എന്നിവരും തുടർച്ചയായി സ്ഥിതി​ഗതികൾ വിലയിരുത്തുന്നുണ്ട്. പ്രയാഗ്‌രാജിലെ സാഹചര്യം നിലവിൽ യന്ത്രണവിധേയമാണെങ്കിലും
തീർത്ഥാടകർ ആദ്യം പുണ്യസ്നാനം ചെയ്തതിന് ശേഷം തിരക്ക് കുറയുന്ന സാഹചര്യത്തിൽ മാത്രമേ സ്നാനത്തിനായി എത്തൂവെന്ന് സന്യാസി സമൂഹം അറിയിച്ചു.