ബ്രഹ്മപുരം വിഷയം ;കൊച്ചി നിവാസികൾ പാലിക്കേണ്ട ജാഗ്രതാ നിർദ്ദേശങ്ങൾ എടുത്ത് പറഞ്ഞ് നടൻ ഉണ്ണി മുകന്ദൻ,ചലച്ചിത്ര താരങ്ങൾ പ്രതികരിക്കാത്തതിൽ വിമർശിച്ച് നിര്‍മ്മാതാവ് ഷിബു ജി സുശീലന്‍

കൊച്ചി : ബ്രഹ്‍മപുരത്തെ അടങ്ങാത്ത വിഷപ്പുകയിൽ കൊച്ചി നിവാസികൾ പാലിക്കേണ്ട ജാഗ്രതാ നിർദ്ദേശങ്ങൾ എടുത്ത് പറഞ്ഞ് ഓർമ്മിപ്പിച്ച് നടൻ ഉണ്ണി മുകുന്ദൻ.ആരോഗൃ വകുപ്പ് വിഷപ്പുകയുമായി ബന്ധപ്പെട്ട ചില മാർഗ നിർദ്ദേശങ്ങളും മറ്റും ജനങ്ങൾക്കായി നൽകിയിരുന്നു അത് വീണ്ടും ഓർമിപ്പിക്കുകയാണ് നടൻ.ജില്ലാ ഭരണകൂടം പുറത്തിറക്കിയ ജാഗ്രതാ നിര്‍ദ്ദേശങ്ങളെക്കുറിച്ചുള്ള ഒരു പത്ര കട്ടിംഗ് പങ്കുവച്ചുകൊണ്ട് സോഷ്യല്‍ മീഡിയയിലൂടെയാണ് ഉണ്ണി മുകുന്ദന്‍റെ കുറിപ്പ്.താരത്തിന്റെ കുറിപ്പ് ഇങ്ങനെ ..

‘കൊച്ചിയിലും പരിസര പ്രദേശങ്ങളിലും വസിക്കുന്ന എല്ലാവരോടും, നിങ്ങളുടെ കുട്ടികളുടെയും നിങ്ങളുടെയും സുരക്ഷിതത്വത്തിന്‍റെ കാര്യം ശ്രദ്ധിക്കാന്‍ ഞാന്‍ അഭ്യര്‍ഥിക്കുന്നു. ബ്രഹ്‍മപുരം മാലിന്യ സംസ്കരണ പ്ലാന്റില്‍ അടുത്തിടെയുണ്ടായ തീപിടുത്തം കാരണം വീടിന് പുറത്തിറങ്ങുമ്പോള്‍ ബന്ധപ്പെട്ട അധികൃതര്‍ നല്‍കുന്ന മാര്‍ഗനിര്‍ദേശങ്ങള്‍ പാലിക്കുക. നിങ്ങളുടെ പ്രിയപ്പെട്ടവരുടെ സുരക്ഷിതത്വം ശ്രദ്ധിക്കുക. വായുമലിനീകരണം മൂലമുണ്ടാകുന്ന ആരോഗ്യ പ്രശ്നങ്ങളെ കരുതിയിരിക്കുക’, ഉണ്ണി മുകുന്ദന്‍ കുറിച്ചു.

അതേസമയം ബ്രഹ്‍മപുരം വിഷയത്തില്‍ കൊച്ചിയില്‍ താമസിക്കുന്ന ചലച്ചിത്ര താരങ്ങള്‍ പ്രതികരിക്കാത്തതിനെതിരെ രംഗത്തെത്തിയിരിക്കുകയാണ് നിര്‍മ്മാതാവ് ഷിബു ജി സുശീലന്‍.കൊച്ചിയിലെ ജനങ്ങളെ ശ്വാസം മുട്ടിച്ചു കൊല്ലുന്നത്തിന് എതിരെ പ്രതികരിക്കാൻ കൊച്ചിയിൽ താമസിക്കുന്ന നമ്മുടെ സ്റ്റാറുകളായ മമ്മൂക്ക, ലാലേട്ടൻ, പൃഥ്വിരാജ്, തുടങ്ങി എല്ലാവരും മുന്നോട്ട് വരണമെന്ന് അപേക്ഷിക്കുന്നുവെന്നാണ് സുശീലൻ പറയുന്നത്.നമ്മൾ ഉറക്കത്തിലും ഈ വിഷവായുവല്ലേ ശ്വസിക്കുന്നത് എന്നും അതോ നിങ്ങളുടെ വീടുകളിൽ വേറെ വായു ഉല്‍പാദിപ്പിക്കുന്നുണ്ടോ? എന്നും സുശീലൻ ചോദിച്ചു. ജീവിക്കാൻ വേണ്ട ജീവവായു നിഷേധിക്കുന്ന അധികാരികൾക്കെതിരെ സംസാരിക്കാൻ പോലും എന്താണ് കാലതാമസമെന്നും അദ്ദേഹം ചോദിച്ചു.